
马尔巴大师教言集MARPA9དཔལ་ནཱ་རོ་པའི་རྣམ་ཐར་དང་གསུང་མགུར།
1-1-65a
༄༅། །དཔལ་ནཱ་རོ་པའི་རྣམ་ཐར་དང་གསུང་མགུར།
༄། །ཕྱི་ལུང་བསྟན་ཚོལ་དུས་ཀྱི་དཀའ་བ་ལ་བརྟེན་ནས་སྣོད་ལྡན་ངོས་བཟུང་བ།
༈ སྣོད་ལྡན་རིགས་ཀྱི་ཆེ་བ།
བླ་མ་དམ་པ་རིན་པོ་ཆེ་བ་རྣམས་ལ་ཕྱག་འཚལ་ལོ། །ལུས་སྲོག་ལྟོས་པ་མེད་པར་ནི། །བླ་མ་དམ་པ་བསྟེན་མཛད་ཅིང་། །རྡོ་རྗེའི་སྐུ་ཐོབ་རྣལ་འབྱོར་པ། །དཔལ་ལྡན་ན་རོའི་ཞབས་ལ་འདུད། །དེ་ལ་རྗེ་ན་རོ་པ་ཆེན་པོ་ལ་ཡོན་ཏན་དཔག་ཏུ་མེད་ཅིང་བརྗོད་ཀྱིས་མི་ལང་ཡང་། མདོར་བསྡུས་ན་བཞི་སྟེ། དེ་ལ་ཕྱི་ལུང་བསྟན་ཚོལ་དུས་ཀྱིས་(ཀྱི་)དཀའ་བ་ལ་བརྟེན་ནས་སྣོད་ལྡན་ངོས་བཟུང་བ། ནང་སྡུག་བསྔལ་ཉམས་ལེན་གྱི་དཀའ་བ་ལ་བརྟེན་ནས་བརྡའ་དོན་འགྲོལ་བ། གསང་བ་གཅེས་འཕངས་འབུལ་བྱེད་ཀྱིས་(ཀྱི་)དཀའ་བ་ལ་བརྟེན་ནས་ཐབས་ཀྱི་སྒྲོན་མེ་བལྟམ་པ། དེ་ཁོ་ན་ཉིད་བཀའ་ཉན་གསུང་སྡོད་ཀྱི་དཀའ་བ་ལ་བརྟེན་ནས་འབྲས་བུ་མངོན་དུ་གྱུར་པའོ། །དེ་རེ་རེ་ལ་ཡང་གཉིས་གཉིས་སྟེ(ཏེ)། སྣོད་ལྡན་རིགས་ཀྱི་ཆེ་བ་དང་། ལུང་བསྟན་རྟོགས་པས་ཆེ་བ་གཉིས། སྨི་(སྨིན་)ལམ་དབང་གིས་མཐོངས་དབྱེ་བ་དང་། གྲོལ་ལམ་ཐབས་ཀྱི་སྒྲོན་མེ་བལྟམ་པ་གཉིས། བདེ་བའི་སྒྲོན་མེ་སྤར་བ་གཉིས(དང་)། ཟག་པ་མེད་པའི་སྒྲོན་མེ་སྤར་བ་གཉིས། སྤྱོད་པ་ལ་རྟགས་ཐོན་པ་དང་། འབྲས་བུ་མངོན་དུ་གྱུར་པ་གཉིས་ཏེ། ཟུང་བཞི་ཡ་བརྒྱད་ཀྱི་འཆད་པར་བྱེད་དོ། །དེ་ལ་དང་པོ་ནི་དེ་ཡང་རྒྱ་གར་ཀ་སྨི་ར་ཞེས་བྱ་བའི་རྒྱལ་ཁམས་ཀྱི་གྲོང་ཁྱེར་འབུམ་ཕྲག་འགའ་ཞིག་གི་དབུས། འདོད་པའི་ཡོན་ཏན་ཡོངས་སུ་རྒྱས་པ། རྒྱལ་པོའི་ཕོ་བྲང་འཁོར་གླང་པོ་ཆེ་དང་ཤིང་རྟ་དང་རྟའི་ཚོགས་ཀྱིས་ཡོངས་སུ་གང་བ། སྐྱེད་མོས་ཚལ་དང་འབངས་རིགས་སུ་བཅས་པ། དེར་ཡབ་རྒྱལ་པོ་དགེ་བའི་གོ་ཆ་ཞེས་བྱ་བ་དང་། གཙུན་(བཙུན་)མོ་དཔལ་གྱི་བློ་གྲོས་མ་གཉིས་ལ། སྲས་མོ་དཔལ་གྱི་ཡེ་ཤེས་མ་ཞེས་བྱ་བ་
1-1-65b
བྱུང་། དེར་སྲས་ཀྱིས་དབེན་ནས། ཡར་བླ་མ་དཀོན་མཆོག་ལ་མཆོད་པ་དང་། སེམས་ཅན་ལ་སྦྱིན་གཏོང་ཡང་རྒྱ་ཆེན་པོ་མཛད། རྟེན་ཁྱད་པར་ཅན་ཐམས་ཅད་ལ་ཡང་མཆོད་པ་བྱས་པ་དང་། སྲས་ཀྱིས་གསོལ་བ་བཏབ་པ་དང་། རྒྱལ་གྱི་ཟླ་བ་ལ་སྲས་གཅིག་བཙས་པ་དང་། ཤིན་ཏུ་མཚན་དང་ལྡན་པ་གཅིག་བྱུང་སྟེ། བྲམ་ཟེ་མཚན་མཁན་ལ་བསྟན་པས། འདི་ནི་ཟས་གཙང་སྲས་བཞིན་དུ། །ཁྱིམ་གནས་མིའི་བདག་པོ་ལ། །བྱུང་ན་ཚོགས་གཉིས་རབ་རྫོགས་པའི། །ཚེ་འདི་ཉིད་དུ་སངས་རྒྱས་འགྱུར་ཞེས་ལུང་བསྟན་ཏེ། རྒྱལ་བུ་ཀུན་ཏུ་བཟང་པོ་ཞེས་བྱ་བར་མཚན་བཏགས་སོ། །དེར་ཤིན་ཏུ་སྐྱེད་ཆེ་བར་བྱུང་སྟེ། རང་བཞིན་གྱིས་ཡོན་ཏན་དུ་མ་དང་ལྡན་པར་གནས་པ་ལ། ཡབ་ཀྱི་ཁྱིམ་ནས་ཁྱིམ་མེད་པར་རྒྱལ་སྲིད་སྤངས་ཏེ། རབ་ཏུ་བྱུང་གིས་དོགས་ནས། ཡི་གེ་ལ་སོགས་པ་སློབ་དུ་མ་སྟེར་བས། ཡབ་ཡུམ་གཉིས་ཀྱིས་མ་ཚོར་བར་སླབས་པས་ཚེགས་མེད་པར་ཤེས་སོ། །རྒྱལ་བུ་རབ་ཏུ་འབྱུང་བར་འདོད་པ་ལ། ཡུམ་གྱི་མ་གནང་བ་ལས། ཆོས་ལ་མ་སྟེན་ཅི་བྱས་དག །སྡུག་བསྔལ་ཡིན་གྱིས་དམ་ཆོས་ཉན་གསུང་ནས། རིགས་བྲམ་ཟེའི་རིགས་སློབ་དཔོན་འཕགས་པའི་ནམ་མཁའ་བྱ་བ་ལ་ཆོས་མང་དུ་གསན་ཏེ། རིག་པའི་གནས་ལྔ་ལ་མཁས་པར་བསླབས་ནས་དགེ་བསྙེན་མཛད་དེ། མཚན་ཡང་ནམ་མཁའི་སྙིང་པོར་བཏགས་སོ། །དེ་ནས་པཎ་ཌི་ཏ་(པཎྜི་ཏ་)སུམ་བཅུ་(ཅུ་)བཞི་བཅུ་ཙམ་ཁྲིད་དེ་ཕ་མ་ཅན་དུ་འོངས་པ་ལས། ཕ་མ་དེ་དག་ཆོས་བྱེད་པ་ལ་མི་དགའ་བས་ཡབ་རྒྱལ་པོ་ན་རེ། ཕ་མ་དཀོན་མཆོག་རང་བཞིན་ལ། །བརྩེ་བའི་ཡིད་ཀྱིས་མ་ཉན་པར། །རྒྱལ་སྲིད་མཆིལ་
1-1-66a
མའི་ཐལ་བཞིན་སྤངས། །ཕ་མས་མ་གནང་དམ་ཆོས་ཅི། །ཁྱིམ་གྱི་གནས་སུ་བཞུགས་སུ་གསོལ། །ཞེས་ཟེར་ནས་ཁབ་ཏུ་བཞུགས་ལ་རྒྱལ་སྲིད་སྐྱོང་དགོས་ཟེར་པ་ལ། རྒྱལ་བུས། འགྲོ་དྲུག་ཕ་མའི་རང་བཞིན་ལ། །གཅིག་གཉིས་ཕ་མར་ངེས་མེད་ཀྱང་། རྟོག་མེད་གཙང་སྦྲ་ལ་གནས་ཤིང་། །མུ་སྟེགས་དྲི་བྲལ་ཐེག་ཆེན་རིགས། །རྙེད་ན་བདག་ལ་བཀའ་སྩོལ་ཅིག །ཅེས་གསུངས་པས། ཡབ་ཐུགས་མི་བདེ་བ་ལ། བློན་པོས་དྲིས་པས། སྲས་ལ་བཙུན་མོ་དེ་ལྟ་བུ་མི་རྙེད་པ་ཟེར་བ་ལ། བློན་པོ་ན་རེ། ཀྱེ་རྒྱལ་པོ་ཆེན་པོ་ལགས། །དེ་ལ་ཐུགས་ངན་མ་མཛད་གཅིག(ཅིག) །འཇིག་རྟེན་ཁམས་ནི་རྒྱ་ཆེ་བས། །དྲི་མ་མེད་པ་བཙལ་བས་རྙེད་ཟེར་ནས། །རྔན་པ་གསེར་མང་པོ་སྦྱིན་པར་བྱས་ནས་ཚོལ་དུ་བཏང་བས། ཤར་ཕྱོགས་བྷ་ག་ལ་ནས་བྲམ་ཟེ་སྐར་རྒྱལ་གྱི་སྲས་མོ་དྲི་མ་མེད་པ་ཞེས་བྱ་བ་རྙེད་ནས། རྒྱལ་བུའི་ཁབ་ཏུ་བླངས་ནས་སློབ་མར་བྱ་ཏེ་(སྟེ་)ཡོད་པ་ལས། །རྒྱལ་བུ་སྐྱོ་བ་སྐྱེས་ནས། དྲི་མེད་མ་དང་གྲོས་བྱས་ཏེ་ཆོས་ཀྱི་བར་ཆོད་མི་བྱེད་པར་བྱས་ཏེ། རྒྱལ་བུས་བུད་མེད་སྐྱོན་ནི་སྣ་ཚོགས་པས། གཡོའ་སྒྱུ་དུག་གི་འདམ་རྫབ་དུ(ཏུ)། །རང་སེམས་གླང་པོ་བྱིང་གྱུར་པས། །དེ་བས་བདག་ནི་རབ་ཏུ་འབྱུང་། །དེ་ནས་ཁ་ཆེའི་ཡུལ་གྱི་གཙུག་ལག་ཁང་དགའ་བའི་ཚལ་དུ་མཁན་པོ་སངས་རྒྱས་སྐྱབས་དང་སློབ་དཔོན་ཡེ་ཤེས་འོད་གཉིས་ལ་(ལས་)དགེ་ཚུལ་གྱི་སྡོམ་པ་བླངས་ནས། མིང་ཡང་སངས་རྒྱས་ཡེ་ཤེས་ཞེས་བྱ་བར་བཏགས་སོ། །དེ་ནས་དགེ་ཚུལ་ཡང་སངས་རྒྱས་ཀྱི་བསྟན་པ་མ་རྫོགས་པ་ཡིན་པས། རྒྱ་གར་དབུས་ཀྱི་གཙུག་ལག་ཁང་དུ་ལ་ཁེ་ཏྲ་ཞེས་བྱ་བར་སློབ་དཔོན་ཆོས་ཀྱི་ཡེ་ཤེས་དང་། མཁན་པོ་ཆོས་ཀྱི་བླ་མ་དང་། སློབ་དཔོན་ཆོས་ཀྱི་རྒྱལ་མཚན་གསུམ་ལ་དགེ་སློང་གི་
1-1-66b
བསླབ་པ་མནོས་ཏེ། དགེ་སློང་ཆོས་ཀྱི་རྒྱལ་མཚན་དུ་གྲགས་སོ། །དེར་མཁན་སློབ་དེ་རྣམས་ལ་ཡང་ཐོས་བསམ་མཐར་ཕྱིན་པར་མཛད་དེ། སྡེ་སྣོད་འཛིན་པ་ཆེན་པོར་གྱུར་ནས་ཚོགས་པ་ཡང་འདུས་ནས་བཤད་པ་ཡང་མཛད་དེ། གནས་བརྟན་བསྟན་པ་འཛིན་པ་ཞེས་བྱ་བར་གྲགས་སོ། །དེ་ནས་ན་ལེན་ཏྲའི་ནུབ་སྒོའི་མཁན་པོ་ཨ་བ་འདུ་ཏི་བ་ཞེས་བྱ་བ་གྲོངས་པའི་ཚབ་མར་སྤྱན་དྲངས་ནས། མཁན་པོར་དབང་བསྐུར་བའི་པཎ་ཌི་ཏ་(པཎྜི་ཏ་)ཆེན་པོར་གྱུར་ནས་ཕྱི་ནང་གཉིས་ཀྱིས་བརྩོད་པ་བྱས་པ་ལས་ལན་གསུམ་དུ་རྒྱལ་ཏེ། ཐ་སྙད་དོན་འཚོལ་ལྕགས་ཀྱུ་ཡིས། །རྒོལ་ངན་མཆིལ་བ་གཟན་ལ་དྲངས། །རིག་པ་སྒྲ་ཚད་རལ་གྲི་ཡིས། །རྒོལ་ངན་སྡོང་པོ་རྩད་ནས་གཅད། །ལུང་ནི་རིག་པའི་སྒྲོན་མེ་ཡིས། །རྒོལ་ངན་མ་རིག་མུན་པ་སེལ། །སྡོམ་གསུམ་འཕགས་པའི་ནོར་ཚོགས་ཀྱིས། །མ་དག་འཁྲུལ་བའི་དྲི་མ་འཁྲུ། །མན་ངག་རྐྱེན་གྱི་འཁྲུལ་འཁོར་གྱིས། །སྒྱུ་མ་ལོག་འཚོའི་གྲོང་ཁྱེར་བཅོམ། །རྒྱལ་པོ་པཎ་ཆེན་སྤྱན་སྔ་རུ། །ན་ལེན་ཏྲ་ནས་བརྡར་བརྡར་ནས། མུ་སྟེགས་ལྗོན་ཤིང་རྩད་ནས་སྲེགས་(བསྲེགས)། །སངས་རྒྱས་བསྟན་པའི་རྒྱལ་མཚན་བཙུགས། །ཞེས་གསུངས་པས། དེར་ན་ལེན་ཏྲ་པ་རྣམས་ཀྱིས། དཔལ་ལྡན་འཇིགས་མེད་གྲགས་པར་བཏགས་སོ། །དེ་ནས་མཁན་པོའི་བྱ་བ་ཆོས་འཆད་པ་དང་། བསླབ་པ་འབོགས་པ་དང་། རབ་གནས་བྱེད་པ་དང་། སེམས་བསྐྱེད་པ་དང་། དབང་བསྐུར་བྱིན་བརླབས་(རླབས་)མཛད་པའི་ཚེ། ལྟ་རྟོག་མང་པོ་མཛད། ནུབ་མོ་ཆོས་པོ་ཏི་ཞལ་ཐོན་མཛད། །བར་བར་དུ་བསྐྱེད་རྫོགས་བསྒོམ་པ་ལ། དེ་ནས་ཆོས་གཅིག་འཆད་པའི་དུས་ན། བུད་མེད་རྒན་མོ་མི་སྡུག་པའི་མཚན་སུམ་བཅུ་(ཅུ་)རྩ་གཉིས་
1-1-67a
དང་ལྡན་པ་གཅིག་བྱུང་ནས། རེས་ངུ་རེས་རྒོད་ཅིང་འདུག་པ་ལས། དེ་དོན་ཅི་ཡིན་དྲིས་པས། ཁྱོད་ཀྱིས་ཆོས་འཆད་ལུགས་ལ་དགའ་དོན་ལ་ངུ་ཟེར། འོ་ན་ཁྱོད་ཀྱིས་གང་ཤེས་བྱས་པས། ཆོས་འཆད་པ་དེ་ཚིག་ཤེས་ནས་འཆད་དམ་དོན་ཤེས་ནས་འཆད་ཟེར། ཚིག་ཤེས་བྱས་པས་དེ་ལྟར་ཡིན་ཟེར་སྐད། འོ་ན་དོན་སུས་ཤེས་བྱས་པས་ངའི་མིང་པོས་ཤེས་ཟེར་རོ། །དེ་དང་(འཇལ་)མཇལ་བས་ཁྱོད་ཀྱིས་ཁྲིད་པར་ཞུ་བྱས་པས། ད་ལྟ་ཕྱིན་ཡང་མི་མཐོང་གསོལ་བ་ཐོབ་དང་འཕྲད་པར་འདུག་གིས་(གི་)ཟེར་ནས་མི་སྣང་བར་གྱུར་ཏེ། དེར་ན་རོ་པ་ཡིས་བུད་མེད་མི་སྡུག་པའི་མཚན་སུམ་བཅུ་(ཅུ་)རྩ་གཉིས་དང་ལྡན་པ་དེ་མཐོང་བ་ལ་བརྟེན་ནས། ཕྱི་ལྟར་ན་འཁོར་བའི་ཉེས་དམིགས་རྒྱུ་འབྲས་ཕྲ་རགས་སུམ་བཅུ་(ཅུ་)རྩ་གཉིས་རྗེས་སུ་དྲན། འཁོར་བ་སྡུག་བསྔལ་གྱི་རང་བཞིན་དུ་གོ། ནང་མི་གཙང་བའི་རྫས་སུམ་བཅུ་(ཅུ་)རྩ་དྲུག་གིས་རང་ལུས་མི་རྟག་ཅིང་འཇིག་པའི་ཆོས་ཅན་དུ་གོ། གསང་བ་ལྟར་ན་རྩ་འདབ་སུམ་བཅུ་(ཅུ་)རྩ་གཉིས་བྱང་ཆུབ་སེམས་སུམ་བཅུ་(ཅུ་)རྩ་གཉིས་ཀྱིས་(ཀྱི་)གནད་ལ་བརྟེན་ནས། ལྷན་ཅིག་སྐྱེས་པའི་ཡེ་ཤེས་རྟོགས་དགོས་པར་གོ། དེའི་གནད་དང་འགྲོ་ལྡོག་རྒྱུ་འབྲས་ཕྱེད་པས་གོ་ལུགས་གསུམ་དུ་གོ། འཁོར་བ་གཞན་གྱི་སྐྱོན་དང་དབང་པོ་རྟོག །མེ་དོང་བཟོད་བྲལ་ཁྲི་མུན་མུན་པ་ནག །དུག་གསུམ་འདམ་རྫབ་ཟབ་ཅིང་རྦ་རླབས་དག །སྲིན་གྱི་ཁ་ཆུས་མཐུམས་(འཐུམས་)ཤིང་བརྒྱའི་སྒྲོག་དུ་(ཏུ་)ཆུད། །བདུད་ཀྱི་གཉའ་ལག་བཅིངས་ཤིང་མི་འདོད་དོང་དུ་ཚུད། །རི་དྭགས་སྨིག་རྒྱུ་སྙག་ཅིང་ལས་ཀྱི་རྒྱུ་མདུད་དམ། །སྦྲང་མ་རྩི་ལ་འབྱར་ལྟར་ཚེ་འདི་བ་མོ་འཇོ། །སྲིན་མོའི་གླིང་དུ་
1-1-67b
འབྱམས་ཤིང་འཆི་བའི་ཞགས་པས་བཅིངས། །དུས་རྣམས་ལོག་ཅིང་སྙིགས་མའི་སྤྱོད་པ་ངན། །སྐྱེ་རྒའི་གྲིབ་སོས་གཏུགས་ཏེ་འཆི་བདག་གཞན་དབང་འགྱུར། །འཆི་བདག་ཤ་ཁྱིས་ཟུག་ཤིང་རི་དྭགས་བརྒྱར་ཆུད་འདྲ། །རྔོན་པ་བརྩེ་བྲལ་སྐྱབས་མེད་ལམ་འཕྲང་དོག །ལམ་འཕྲང་རིང་ཞིང་བཟུང་འཛིན་ནེའུ་ཐང་ཡངས། །ཆོས་བརྒྱད་རྟ་པོ་རྒྱུག་ཅིང་མདུང་རྩེ་རྔ་བྲོ་བརྡུངས། །གར་མཁན་མི་རྟག་བསྒྱུར་ཞིང་ཆུ་ཤིང་སྙིང་པོ་མེད། །ཆུ་ཟླ་ངོས་བཟུང་མེད་དེ་ཆུ་སྦུ་འཁྲུལ་པར་སྣང་། །ཆུ་གཉེར་ན་བུན་ཡལ་ཏེ་ལོག་པའི་ཀུན་རྫོབ་ཞེན། །མི་རྟག་དལ་འབྱོར་དུས་འདི་རུ། །བསྒོམས་ཏེ་བླ་མ་ཅིས་མི་བཙའ་ཞེས་གསུངས་པས། རྟེན་དང་ཆ་རྐྱེན་དང་དཔེའ་ཐམས་ཅད་སྤོང་དག་བྱ་སྟེ། ང་ཆོས་དོན་སྟོན་པའི་ཡང་དག་པའི་བླ་མ་འཚོལ་དུ་འགྲོ་གསུང་ཏེ(སྟེ)། ལམ་དུ་ཞུགས་ནས་ཆས་པ་ལ། བྱང་སྒོ་བ་འཛེ་ཏ་རེ་དགྲ་ལས་རྣམ་པར་རྒྱལ་བའི་ཞལ་ནས། བསྟན་རྩ་དགེ་འདུན་སྡེ་ཡིན་པས། སྡེ་སྤངས་ཆོས་མེད་བཞུགས་སུ་གསོལ། ཤར་སྒོ་བ་མི་ཐུབ་ཟླ་བ་ན་རེ། བསྟན་རྩ་སྡོམ་ལྡན་གྲོགས་ཡིན་པས། །གྲོགས་སྤངས་ཆོས་མེད་བཞུགས་སུ་གསོལ། ལྷོ་སྒོ་བ་ནག་པོ་ན་རེ། བསྟན་རྩ་སྡོམ་ལྡན་ཁྲིམས་ཡིན་པས། ཁྲིམས་སྤངས་ཆོས་མེད་བཞུགས་སུ་གསོལ། །དེར་ན་ལེན་ཏྲ་པ་ཐམས་ཅད་ན་རེ་མགྲིན་ཅིག་(གཅིག་)ཏུ་གསོལ་བ་བཏབ་པ། བདག་ཅག་མི་ཤེས་གཏི་མུག་པས། །ཆོས་ཀྱི་སྨིན་པ་མཁས་དང་བྲལ་བ་དེ་བས་དཔལ་ལྡན་འཇིགས་མེད་གྲགས། བདག་ཅག་དོན་དུ་བཞུགས་སུ་གསོལ། ཞེས་གསོལ་བ་བཏབ་པས། ན་རོ་པས་སྐྱེས་པ་འཆི་ཞིང་འདུས་པ་འབྲལ། །བསགས་པ་འཛད་ཕྱིར་བདག་ཉིད་ལ། །མི་འཆི་
1-1-68a
ཐར་ལམ་ག་ལ་ཡོད། །སྒྲ་ཚད་བསྟན་ཆོས་སྣ་ཚོགས་དང་། །གནས་ལྔ་རིག་པ་མཁས་གྱུར་ཀྱང་། །སྡེ་སྣོད་རྒྱ་མཚོའི་དོན་ཤེས་ཀྱང་། །མཚན་ལྡན་བླ་མ་མེད་གྱུར་ན། །སྐོམ་པའི་ཚད་པ་ཞི་མི་ནུས། །རྒྱུད་སྡེ་རྒྱ་མཚོ་ལྟ་བུའི། །སྙིང་པོ་བྱིན་བརླབས་(རླབས་)བདུད་རྩིའི་རྒྱུན། བླ་མའི་བྱིན་བརླབས་(རླབས་)དངོས་གྲུབ་ཀྱིས། །རང་རྒྱུད་ཚིམ་པར་མ་བྱས་ན། །རྫུ་འཕྲུལ་ཡོན་ཏན་མངོན་ཤེས་ཚོགས། །དུ་མ་ཡོད་ཀྱང་དོན་མི་མཐོང་། །དེ་བས་བདག་ནི་ཅི་ནས་ཀྱང་། །ཀྱེའི་རྡོ་རྗེ་ལ་བརྟེན་ནས། །བླ་མ་དམ་པ་བཙལ་བར་བྱ། །ཞེས་གསུངས་ནས། སྣམ་སྦྱར་འཁར་བསིལ་ཐོགས་ནས། །ཤར་ཕྱོགས་སུ་བྱོན་པར་བཞེད་པའི་ཚེ། ནམ་མཁའ་ནས་སྒྲ་ཅིག་(ཞིག་)གྲག་སྟེ། བདེ་མཆོག་འཁོར་ལོ་(ལོར་)བརྟེན་ནས། བླ་མ་སངས་རྒྱས་ལུང་བསྟན་འབྱུང་ཞེས་པ་དང་། ཡང་དེ་ནས་བརྩམས་ཏེ་བདག་ཉིད་ཀྱིས། བདེ་མཆོག་འཁོར་ལོ་ཅིས་མི་འགྲུབ་གསུང་ནས། མེ་ཏོག་རྣམ་བུ་ཅན་གྱི་དུར་ཁྲོད་དུ་རྩའི་སྤྱིལ་པོ་བྱས་ཏེ་བསྒྲུབ་པ་མཛད་པའི་དུས་སུ། དཔལ་བདེ་མཆོག་ཡི་གེ་བདུན་པ་ལ་བསྙེན་པ་འབུམ་ཕྲག་ཅིག་གམ་གསུམ་སོང་བ་དང་། ས་གཡོ་བ་དང་འོད་དང་དྲི་ཞིམ་པོ་ལྡང་བ་ལ་སོགས་པ་བྱུང་སྟེ་རྨི་ལམ་དུ་མཁའ་འགྲོ་མ་གཉིས་ཀྱིས་ལུང་བསྟན་པ་དང་། ལོ་རྒྱུས་བྱུང་བ་བཞིན་དུ་དངོས་སུ་ཡང་བྱུང་སྟེ། ཤར་ཕྱོགས་ངོས་ཀྱི་ཏེ་ལོ་པ། གཉིས་མེད་ཡེ་ཤེས་བདེ་བའི་བདག །འགྲོ་མགོན་བདེ་བའི་སྤྲུལ་པ་ཅན། །བླ་མ་སངས་རྒྱས་ཡོད་ཀྱི་ཚོལ། །ཞེས་པའི་སྒྲ་ཐོས་ནས་ཕྱིན་པ་དང་། ཟླ་བ་ཅིག་(གཅིག་)དུས་ཕྱོགས་མང་པོར་ཕྱིན་ཡང་བླ་མ་མ་རྙེད་པས། ཀྱེ་མ་བླ་མ་སངས་རྒྱས་དག །བཙལ་ཡང་མི་རྙེད་བདུད་ཀྱིས་བསླུས་བྱས་པ་དང་། ཡང་
1-1-68b
ནམ་མཁའ་ནས། །ལེ་ལོའི་བདུད་ལ་མ་བསྐུར་བར། །བཙལ་ན་བླ་མ་སངས་རྒྱས་རྙེད། །ཅེས་གྲག་ནས། ཡང་ཚོལ་དུ་བྱོན་པས། དཀའ་ཕྲན་བཅུ་གཉིས་ཀྱི་སྤྱད་ཚུལ་ནི་འཕྲང་དོག་པ་ཅིག་དུ་(ཞིག་ཏུ་)ཕྱིན་ཙམ་ན། མཛེ་པོ་སྦྲ་དང་བཅས་པ་ཅིག་(ཞིག་)དང་ཕྲད་པས། དེར་རྐང་ལག་ལྡུམ་པོ་དེས་ལམ་ཀག་ནས་འདུག་པ་ལ་ཕར་ནུར་བྱས་པས་སྣ་བཀབ་ནས་ཟུར་ཙམ་ན་ཕར་འགོངས་པས། རྟོག་པ་མེད་ན་བླ་མ་རྙེད་པའི་རྒྱུ་མཚན། ཐམས་ཅད་དབྱེར་མེད་སྙུག་མའི་དོན། རྟོག་མེད་མཐའ་དང་བྲལ་བ་ལ། །རྟོག་པ་དང་བཅས་ཁྱོད་ཀྱིས་ནི། བླ་མ་རྙེད་པར་ག་ལ་འགྱུར། ཞེས་གསུངས་ནས་སེ་གོལ་ཅིག་རྟོགས་(ཏོག་)ནས་མི་སྣང་བར་གྱུར་ཏོ། །ཡང་བྱེ་སྟོངས་ཅིག་ན་ཕར་ཕྱིན་ཙ་ན། ཁྱི་ཁོག་སྟོང་མི་ལ་ཟུགས་པ། ཁོག་རྨད་རུལ་བ་འབུས་ཁེངས་པ་ཅིག་དང་། ཕྲད་དེ། དེས་ལམ་འཕྲེད་བཅད་ནས་འདུག་པ་ལ། འགོངས་ནས་འོངས་པས། འགྲོ་དྲུག་ཕ་མའི་རང་བཞིན་ལ། སྙིང་རྗེ་ཆེན་པོ་མ་སྐྱེས་ཤིང་། ཐེག་ཆེན་ལམ་དུ་མ་ཞུགས་ན། ལོགས་སུ་བཙལ་བས་ག་ལ་རྙེད་གསུང་། དེར་ཁྱོད་ཇི་ལྟ་བུ་ཅིག་(ཞིག་)ཡིན་བྱས་པས། གང་ཞིག་གཞན་ལ་དམན་ལྟ་བའི། ཁྱོད་འཛིན་བླ་མ་ག་ལ་རྙེད། ཅེས་གསུང་ནས་མི་སྣང་བར་གྱུར་ཏེ། ཡང་ཕྱིན་ཙམ་ན་མི་གཉིས་ཀྱིས་མི་ཅིག་(ཞིག་)གི་མགོ་བརྡུང་པ་ལམ་ཀ་ན་འདུག་པ་ལ། ཏེ་ལོ་པ་མཐོང་ངམ་བྱས་པ་ལ། མཐོང་བ་བསླབ་ཀྱིས་(ཀྱི་)དང་པོ་མི་འདིའི་མགོ་བརྡུང་རོགས་གྱིས་ཞེས་ཟེར་བ་ལ། ཁྱོད་མི་མགོ་བརྡུངས་བའི་རོགས་ངས་མི་ནུས་སྙམ་པ་དང་། སྙིང་རྗེ་ཆེན་པོའི་བསྟན་པ་ལ། །བདག་མེད་སྟོང་པའི་ཐོ་བ་ཡིས། །ངར་འཛིན་མགོ་བོ་མ་བརྡུངས་ནས། །བླ་མ་བཙལ་བས་
1-1-69a
ག་ལ་རྙེད། །ཅེས་གསུངས་སྟེ། སེ་གོལ་ཅིག་བྱས་པས་ན་རོ་པ་བརྒྱལ་ལོ། །དེ་སངས་བ་དང་བལྟས་པས་ཅི་ཡང་མེད་པར་ཡང་འགྲོ་ཞིང་ཡོད་པ་ལ། མི་ཅིག་(གཅིག་)གིས་མི་ཅིག་(གཅིག་)གི་ཁོང་པ་ནས་རྒྱུ་མ་འདྲེན་ཞིང་རལ་གྲི་ཐོགས་གཅོད་པ་ལ། ཏེ་ལོ་པ་མཐོང་ངམ་བྱས་པས། ངའི་རོགས་འདི་གྱིས་དང་བསྟན་གྱིས་ཟེར་བ་ལ་རོགས་མ་བྱས་པས། ཆོས་ཉིད་སྐྱེ་མེད་རལ་གྲི་ཡིས། །དམིགས་པ་མེད་པའི་ངང་ལས་ནི། །འཁོར་བའི་རྒྱུན་ཐག་མ་གཅད་ན། །བླ་མ་རྙེད་པར་ག་ལ་འགྱུར། །ཅེས་གསུངས་ནས་མི་སྣང་བར་གྱུར་ཏོ། །ཡང་ཡུལ་ལྗོངས་རྒྱུ་ཞིང་མི་ཕྲད་པ་ཐམས་ཅད་ལ་དྲིས་པས་རྒྱུས་མེད་ཟེར། ཡང་མི་ཅིག་(གཅིག་)གིས་ཆུ་ཁ་ཅིག་(ཞིག་)ན་མི་ཤ་མང་པོ་འཁྲུག་པ་དང་ཕྲད་ནས། དེ་ལ་དྲིས་པས་ཡང་སྔར་བཞིན་ཟེར་ནས། དེ་ལས་ཡང་རྟོགས་པ་སྐྱེས་པས། གདམ་ངག་ཟབ་མོའི་ཆུ་རྒྱུན་གྱིས། །རང་སེམས་རྟོག་པའི་དྲི་མ་རྣམས། །འཁོར་བ་རང་གྲོལ་དུ་མ་བཀྲུས་ན། །བླ་མ་རྙེད་པར་ག་ལ་འགྱུར། །གསུང་ནས་མི་སྣང་བར་གྱུར་ཏོ། །ཡང་ལམ་ཅིག་ལ་ཕྱིན་ཙམ་ན། མི་འགའ་དང་ཕྲད་པ་ལ་དྲིས་པས་འཕྲང་འདི་འདས་པ་ན་རྒྱལ་སྲིད་སྐྱོང་བ་ཅིག་(ཞིག་)འདུག་དེ་ལ་དྲིས་ཟེར། དེར་ཕྱིན་ནས་རྒྱལ་པོ་དེ་ལ་དྲིས་པས། ངའི་ལྷ་ཅིག་(གཅིག་)ལོང་། ངའི་འབངས་གྱིས། དེ་ནས་བསྟན་གྱིས། ཟེར་ནས། དེར་བསྡད་པས་ཕྱིས་ལྷ་ཅིག་(གཅིག་)མས་བོར་ཏེ་གཞན་ལ་སོང་། ཞེ་སྡང་སྐྱེས་ནས་མཐུ་བྱ་སྙམ་པའི་ཚེ། ནམ་མཁའ་ནས་སྒྲ་གྲག་པ། འདོད་ཡོན་ལ་རྟེན་(བརྟེན་)ཞེ་སྡང་གིས། །ངན་སོང་གནས་སུ་སྐྱེ་བ་ལས། །བླ་མ་རྙེད་པར་ག་ལ་འགྱུར། །སྒྱུ་མའི་སྐྱེས་བུས་མ་བསླུས་སམ། །ཞེས་ཟེར་བ་དང་། བདེན་སྙམ་སྟེ་ཐོས་ནས་སོང་བའོ། །ཡང་ཆུ་ཀ་ཅིག་(ཞིག་)ན་མར་
1-1-69b
ཕྱིན་ཙ་ན། བུད་མེད་ཁ་ཅིག་དང་། ཕྲད་ནས་ཏེ་ལོ་པ་མ་མཐོང་ངམ་བྱས་པས། རི་འདིའི་རྒྱབ་ན་ནགས་གསེབ་ན་རྔོན་པ་ཅིག་(ཞིག་)འདུག་སྟེ་དེ་ལ་དྲིས་ཟེར། དེར་རི་ནགས་ཐུག་པོའི་རི་དྭགས་མང་པོ་ཡོད་པ་ཅིག་(ཞིག་)ན་རྔོན་པ་མི་ནག་པོ་གོས་སར་རི་གོན་པ་མདའ་གཞུ་ཐོགས་པ་ཅིག་(ཞིག་)དང་ཕྲད་པ་ལ། རྗེ་ཏེ་ལོ་པ་མཐོང་ངམ་བྱས་པ་ལ། དེར་གཞུ་ལ་ཨྰོཾ་ཚུགས་བྱས་ནས། སྒྱུ་ལུས་ཞེན་པ་མེད་པའི་མདའ། །འོད་གསལ་ཉམས་ཀྱི་གཞུ་བཀང་ནས། །ངར་འཛིན་ལུས་ཀྱི་རི་བོ་ཡི། །བག་ཆགས་འཁོར་བའི་ནགས་ཅན་དུ། །གཟུང་འཛིན་གྱི་རི་དྭགས་བརྒྱུ་(རྒྱུ་)བ་གསོད། །གསོད་ལ་དགའ་བའི་རྔོན་པ་ང་། །སང་ནི་གནས་གཞིར་བསོད་སྙོམས་བྱེད། །ཅེས་གསུངས་ནས་མི་སྣང་བར་གྱུར་ཏོ། །ཡང་སང་ཕྱིན་པས་གཙུག་ལག་ཁང་ཅིག་ན་མི་འདུ་ལོང་པ་ཀུན་ལ། རྗེ་བཙུན་ཏེ་ལོ་པ་བྱ་བ་མ་མཐོང་ངམ་བྱས་པས། དེ་ཆ་མེད་མུ་ལྟོ་བ་ཏེ་ལོ་པ་བྱ་བ་ཅིག་(ཞིག་)འདུག་ཟེར་སྐད། དེར་ནང་དུ་ཕྱིན་པ་དང་། འདི་ཡིན་ཟེར་ཙམ་ན་མདུན་ན་མེ་ཅིག་(ཞིག་)བཏང་ནས། དེ་ལ་ཤིག་མང་པོ་བསྲེག་ཅིང་འདུག་པ་ལ། ཕྱག་དང་སྐོར་བ་བྱས་ནས་བདག་རྗེས་སུ་བཟུང་འཚལ་ཞེས་ཞུས་ནས་གདམ་ངག་ཞུས་པས་ཤིག་པར་གང་གཏད་དེ་སྲེགས་ཞེས་གསུངས་པས། ཁམས་གསུམ་འཁོར་བའི་སེམས་ཅན་རྣམས། །ཆོས་ཉིད་ལམ་གྱི་གླང་ཆེན་དུ། །རྣམ་རྟོག་བག་ཆགས་དུ་ཁ་འདི། །བསད་ན་འཛད་ཀྱིས་སོད་ལ་ཐོང་ཅེས་(ཞེས་)གསུང་སྟེ། བསད་མ་ནུས་པས་རང་སྐྱེས་རང་ཟའི་རྣམ་རྟོག་ཤིག །མ་བསད་བླ་མ་ག་ལ་རྙེད། །ང་ནི་ཉ་པ་རྒྱ་མཚོ་སྙག །གསུང་ནས་མི་སྣང་བར་གྱུར་ཏོ། །སང་ཡང་ཡུལ་ཕྱོགས་གཞན་ཅིག་ཏུ་ཕྱིན་ཙམ་ན། བཙུན་པ་རྒན་རྒོན་གཉིས་དེའི་བུ་ཚ་གཉིས་ཀྱང་འདུག །ཞིང་རྨོ་ཞིང་འདུག་པ་ལ། དགེ་
1-1-70a
སློང་གིས་ཏེ་ལོ་པ་མཐོང་ངམ་བྱས་པས། དང་པོར་གདུགས་ཚོད་རན་ནས་གདའ་གསོལ་མཚལ་ཟེར་ནས། ཉ་མང་པོ་ཚགས་མས་བཅུས་ཏེ་བཙོས་ནས་བཙུན་མ་དེས་དྲངས་པས། ཉ་ཚོད་མ་འཐུངས་པར། ཚོད་མ་ཐང་ལ་ཕོ་བས། ཉ་རྣམས་འཕུར་ནས་སོང་སྐད། དེར་རྟོག་པས་བཅིངས་ལ་བླ་མ་དཀའ། །འདོད་ཡོན་རྗེས་ཕྱིར་སྙགས་བྱེད་པའི། །རྣམ་རྟོག་གི་ཉ་འདི་མ་ཟོས་ན། །སྐྱེ་མེད་བླ་མ་ག་ལ་རྙེད། །ང་ནི་ཕ་མ་གསོད་དུ་འགྲོ། །གསུངས་ནས་གནས་དང་བཅས་པ་གར་སོང་ཆ་མེད་དོ། །ཡང་དེའི་སང་དེ་རྙེད་དམ་མི་རྙེད་སྙམ་ཙ་ན། ལམ་ཀ་ཅིག་(ཞིག་)ན་མི་ཅིག་(གཅིག་)གིས་ཕ་མ་སྐྱིགས་ནས་ཐག་པ་བཏགས་ནས་འདུག་པ་ལ། ཏེ་ལོ་པ་མ་མཐོང་ངམ་བྱས་པས། ངའི་ཕ་མ་གསོད་རོགས་གྱིས་དང་བསྟན་གྱིས་ཟེར་དེར་ཆོས་འཚོལ་དུ་འོངས་པ་ལ། ཁྱོད་འཚམས་མེད་པའི་རོགས་ག་ལ་བྱེད་སྙམ་པ་དང་། འཁོར་བའི་རྒྱ་མཚོར་སྐྱུར་བྱེད་པའི། །དུག་གསུམ་ཕ་མ་མ་གསད་པར། །བླ་མ་བཙལ་བས་ག་ལ་རྙེད། །ང་ནི་ལྷ་མོ་ལྟ་རུ་འགྲོ། །གསུང་ནས་མི་སྣང་བར་གྱུར་ཏོ། །ཡང་དེའི་སང་ཕྱིན་པས་ཡུལ་ཕྱོགས་ཅིག་ན་ཁྲོམ་ཆེན་པོ་ཚོགས་ནས་འདུག་པ་ལ། དེར་དམུས་ལོང་གི་ཚོགས་མང་པོ་ཚོགས་ནས་འདུག་པའི་དབུས་ན། །མི་མིག་ཅིག་(གཅིག་)པ་ཞིག་འདུག་པ་དང་། དེ་ཐམས་ཅད་ཀྱང་ཅིག་(གཅིག་)ལ་ཅིག་(གཅིག་)ཁ་དོག་དང་དབྱིབས་འདི་འདྲའོ། །ཞེས་ཟེར་བ་ལ་ཡ་མཚན་ཆེ་བར་བྱུང་བ་དང་། ཡང་མིག་ཅིག་(གཅིག་)པ་དེ་རྒྱབ་ལྟག་པའི་ངོས་ཕྱོགས་དེ་དག་ཡང་མཐོང་བར་འདུག་པ་དང་། དེ་དག་ལ་ཏེ་ལོ་པ་མ་མཐོང་ངམ་བྱས་པས། མིག་ཅིག་(གཅིག་)པ་དེ་ན་རེ། ཕྱིར་ངེད་ཀྱིས་ཏེ་ལོ་མ་མཐོང་སྟེ། ཁྱོད་སྙིང་ནས་ཏེ་ལོ་འཚོལ་བ་ན། །བརྒྱུད་ལྡན་བླ་མ་རྒྱུད་ལ་བསྟེན། །ལྟ་བ་རྟོགས་པའི་རལ་
1-1-70b
གྲི་ཕྱོར། །སྤྱོད་པ་ཆོས་བརྒྱད་བརྒྱ་འདུད་ཁྲོལ། །བསྒོམ་པ་བདེ་གསལ་རྟ་ཕོ་རྒྱུག །འབྲས་བུ་རང་གསལ་ཉི་མ་འདེ། །ཉམས་མྱོང་བདེ་ཆེན་མེ་དཔུང་སྤོར། །རྟོགས་པ་ཡིད་བཞིན་ནོར་བུ་ལྟོས། །མིག་ཅིག་(གཅིག་)དུ་མ་རོ་ཅིག་(གཅིག་)སྟེ། །དམུས་ལོང་ལྟ་རུ་མེད་པར་ལྟོས། །འོན་པ་མཉན་དུ་མེད་པར་ཉོན། །ཞ་འོ་འགྲོ་འོང་མེད་པར་རྒྱུག །དབུགས་བྲལ་སྐྱེ་མེད་གཡབ་མོས་བརྡེབས། །ཅེས་ཟེར་ཏེ། ཡང་ཕྱིན་ཏེ་པར་པ་ཏ་བརྒྱན་(རྒྱན་)གྱི་རི་ཨ་ལང་ཀ་ར་ཅེས་བྱ་བར་ཕྱིན་པ་ན། རྗེས་སུ་བཟུང་བར་ཞུ་སྙམ་ཙ་ན་མི་སྣང་བར་གྱུར་ཏོ། །དེར་ཐུགས་ཆད་བླ་མའི་སྤྲུལ་པ་དང་འཇལ་(མཇལ་)ཡང་མི་ཕན་པར་འདུག །ད་ནི་བདག་གི་བག་ཆགས་རྣམ་སྨིན་མ་དག་པས་མི་འཇལ་(མཇལ་)བ་ཡིན་སྙམ་ནས་སྨྲེ་སྔགས་འདོན་ཞིང་། མཁའ་འགྲོས་ལུང་བསྟན་རྗེས་འབྲངས་ནས། །བསྟན་རྩ་དགེ་འདུན་སྡེ་བོར་ཞིང་། །སྡོམ་ལྡན་ཆོས་ཀྱིས་(ཀྱི་)གྲོགས་སྤངས་ཏེ། །བརྩེ་བས་གྲོས་འདེབས་ངག་བཅག་ནས། །སྡུག་བསྔལ་དཀའ་བ་ཉམས་བླངས་ཀྱང་། །བླ་མ་རྙེད་པར་མ་གྱུར་པས། །བདག་གི་ལུས་འདིས་གེགས་བྱས་སམ། །འདི་དོར་བླ་མ་ཅིས་མི་བཙལ། །ཅེས་(ཞེས་)གསུང་ནས་སྤུ་གྲི་འདོད་ཚད་ཙམ་ན། རྗེ་བཙུན་ཆེན་པོ་མི་ནག་པོ་རལ་བའི་ཐོར་ཚུགས་ཅན་སྐུ་མདོག་དམུག་(སྨུག་)ནག་ཅིག་བྱོན་ན། །བླ་མ་འཚོལ་བའི་སངས་རྒྱས་པའི། །བསད་པས་བླ་མ་ཅང་རྙེད་དམ། །ཁྱོད་འདོད་སྤྲང་པོ་ང་མིན་ནམ། །ཞེས་གསུངས་པ་དང་། སྤྱན་བར་སྣང་དུ་གཟིགས་ནས་སྤྱན་ཆབ་ཕྱུང་ནས། །ཐལ་མོ་ཐུགས་ཁར་སྦྱར་ཏེ། །ཡུས་གསོལ་བ། ནམ་མཁའི་སྤྲིན་ལྟར་ངེས་མེད་པའི། །རྗེ་བཙུན་བཙལ་བས་ག་ལ་རྙེད། །བླ་མའི་ཐུགས་རྗེས་མི་གཟིགས་སམ། །བདག་ནི་འདི་ནས་ཐུགས་རྗེས་ཟུང་། །ཞེས་གསོལ་བ་བཏབ་པས། རྗེ་ཏེ་ལོ་པའི་
1-1-71a
ཞལ་ནས་སྣོད་ལྡན་དྲི་མེད་གཟིའི་བརྗིད་ཁྱོད། །མཁའ་འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུའི། །གདམས་པའི་སྣོད་དུ་ད་གྱུར་ཏོ། །ཞེས་གསུངས་པ་ནི། རྗེས་སུ་བཟུང་བ་སྟེ། སྣོད་ལྡན་རིགས་ཀྱི་ཆེ་བའོ། །
༈ ལུང་བསྟན་རྟོགས་པས་ཆེ་བ།
ལུང་བསྟན་རྟོགས་པས་ཆེ་བ་ནི། དང་པོ་དཔལ་རྡོ་རྗེ་འཆང་གིས་ཕྱིར་མི་ལྡོག་པར་ལུང་བསྟན་པ་ནི། བདེ་ཆེན་བདེ་བའི་འབྱུང་གནས་ཀྱིས། བྱང་ཆུབ་ལམ་སྟོན་འགྲོ་བའི་མགོན། །འོད་གསལ་སྤྲོས་བྲལ་རྟོག་མེད་ཐུགས། །མགོན་གྱུར་ཆོས་ཀྱི་སྤྱན་ཅན་གྱིས། །བཅོམ་ལྡན་རྩ་ཤད་ཕྱིར་མི་ལྡོག །ཅེས་(ཞེས་)གསུངས་སོ། །གཉིས་པ་ཡི་དམ་ལྷ་དཔལ་འཁོར་ལོ་སྡོམ་པས། །པུ་ལ་ཧ་རིའི་དགོན་པར་ནམ་ཕྱེད་ན། །བླ་མ་ལྗོན་ཤིང་ལྟ་བུའི། །སྐྱེ་མེད་སྐུའི་རང་བཞིན་ལ། །འཁོར་གྱི་བྱ་ཚོགས་བསྟེན་མཛད་པ། །ན་རོ་སྐྱེ་མེད་སྐུ་དང་ལྡན། །བླ་མ་ཆུ་རྒྱུན་ལྟ་བུའི། །གདམས་ངག་དྲི་མེད་ཆུ་རྒྱུན་གྱིས། །བརྗོད་མེད་གསུང་གིས་བདུད་རྩི་ཡིས། །ཉོན་མོངས་དྲི་མ་འཁྲུ་མཛད་པ། །ན་རོ་བརྗོད་མེད་གསུང་དང་ལྡན། །བླ་མ་ནམ་མཁའ་ལྟ་བུའི། །སྒྲིབ་མེད་ཡེ་ཤེས་ཉི་མ་ཡིས། །འགྲོ་རྣམས་མུན་པ་སེལ་མཛད་པའི། །ན་རོ་རྟོག་མེད་ཐུགས་དང་ལྡན། །བླ་མ་བསྟེན་བྱར་ལུང་བསྟན་པ། །ཏེ་ལོ་པ་ཡི་སློབ་མ་རྣམས་ཀྱིས། །རྗེ་བཙུན་ནམ་མཁའི་སྤྲིན་བཞིན་ངེས་མེད་པའི། །དེའི་ཕྱིར་དེ་རྣམས་སུ་ལ་རྟེན་(བརྟེན་)པར་བྱ་ཞེས་ཞུས་པས། དྲན་པ་རྗེད་མེད་ན་རོ་པས། །བཅུ་གཉིས་བར་དུ་ང་བསྟན་བྱ། །ངའི་དེ་ཉིད་ཁོ་ལ་ཡོད། །ཕྱི་རབས་སེམས་ཅན་དོན་གཉེར་རྣམས། །རྟོགས་པར་འདོད་ན་ཁོ་ལ་བསྟེན། །ཅེས་བསྟེན་བྱར་ལུང་བསྟན་པའོ། །ཉིད་ཀྱི་རང་གྲོལ་དུ་ལུང་བསྟན་པ་ནི། །ཡིད་ལ་མི་ཕྱེད་ཕྱག་རྒྱ་ཆེན་པོའི་ལམ། །སྤྲོས་བྲལ་སྒྲིབ་མེད་དྲི་བྲལ་སེམས་ཉིད་ཀྱི། །ལྷན་
1-1-71b
ཅིག་སྐྱེས་པའི་ཡེ་ཤེས་མཐོང་བས་ན། །ཡེ་ཤེས་རྟོགས་པས་སུ་ལ་འདྲི་མི་བྱ། །གཉིས་མེད་ཤུགས་བྱུང་རང་གྲོལ་ཡིན། །ཞེས་གསུངས་པའོ། །དེ་ནི་ཕྱིའི་ལུང་བསྟན་ཚོལ་དུས་ཀྱིས་དཀའ་བའི་དུས་སོ། །
༄། །ནང་སྡུག་བསྔལ་ཉམས་ལེན་གྱི་དཀའ་བ་ལ་བརྟེན་ནས་བརྡའ་དོན་འགྲོལ་བ།
ད་ནི་ནང་སྡུག་བསྔལ་ཉམས་ལེན་ཀྱི་དཀའ་བ་གཉིས་ལས།
༈ སྨིན་ལམ་དབང་གིས་མཐོངས་དབྱེ་བ།
དང་པོ་སྨིན་ལམ་དབང་གིས་མཐོངས་དབྱེ་བ་ནི། རྗེ་བཙུན་ཏེ་ལོ་པ་དེ་སྤང་ལ་བེ་ཕུར་བཏབ་པ་བཞིན་བཞུགས། །ལྐུག་པ་ལྟར་མི་སྨྲ། ཐུགས་གཉིས་སུ་མེད་པའི་ངང་ལ་བཞུགས་པ་ལས། རྗེ་ན་རོ་པས་མཎྜལ་ཕུལ་ཕྱག་འཚལ་བསྐོར་བ་བྱས་ནས་གདམས་པ་དང་། རྗེས་སུ་བསྟན་པ་ཞུ་བྱས་པས། བུམ་པའི་དབང་གི་བརྡའ་བཅུ་ཅིག་(གཅིག་)ནས། གསང་དབང་གི་བཅུ་ཅིག(གཅིག) །ཤེས་རབ་ཡེ་ཤེས་ཀྱི་བརྡའ་ལྔ་སྟེ། བརྡའ་ཉི་ཤུ་རྩ་བདུན་གྱི་བར་དུ་གསུངས་ནས། བསྟན་པས་དེ་དག་རིམས་ཀྱིས་བཀྲོལ་བ། བླ་མ་ནོར་བུ་རིན་ཆེན་ལ། དད་གུས་དབང་པོར་གྱུར་མེད་བྱེད། །རང་རྒྱུད་ཤེལ་སྒོང་ལྟར་དག་ཅིང་། །གདམས་ངག་དྲན་པས་ཆུ་རྒྱུན་འཐུང་། །ཆོས་བརྒྱད་ཚེ་འདིའི་བརྒྱ་མདུད་ཁྲོལ། །ཆུ་སྣོད་དུ་མ་རོ་ཅིག་(གཅིག་)ཡིན། །ཆོས་འབྱུང་སྐྱེ་བ་མེད་པ་སྟེ། །ཆོས་སྐུ་ཐིག་ལེ་ཉག་ཅིག་(གཅིག་)ཡིན། །ལྐུག་པ་སྨར་མེད་བརྗོད་དུ་མེད། ཤིང་ཐོག་རང་བཞིན་ཕུན་སུམ་ཚོགས། །བརྡའ་རྣམས་ངག་གི་མདུད་ཀྲོལ་ནས། །ཁྱོད་ནི་བརྡའ་ཤེས་སྐྱེས་བུ་ཡིན། །མཁའ་འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུའི། །སྨིན་བྱེད་ཡེ་ཤེས་མེ་ལོང་ལྟོས། །ཞེས་གསུངས། མ་རིག་མུན་པས་ལྟོངས་གྱུར་པའི། །དམུས་ལོང་བདག་གིས་ཇི་ལྟར་བལྟ། །ཞེས་ཞུས་པས། བལྟ་བ་མེད་པའི་ཚུལ་གྱིས་ལྟོས། །མཐོང་བ་མེད་པའི་ངང་ཉིད་ཀྱིས། །གྲོལ་བ་མེད་པའི་ཚུལ་གྱི་གྲོལ། །དོན་མཐོང་རྣལ་འབྱོར་རང་གྲོལ་འགྱུར། །
1-1-72a
ཞེས་གསུངས། ན་རོ་པས། ཁམས་གསུམ་འཁོར་བའི་རྒྱ་མཚོ་ལས། །སེམས་གྱིས་ནོར་བུ་རིན་པོ་ཆེ། །བླ་མ་གྲུ་རྫིངས་ལ་བསྟན་ནས། །སྨིན་ལམ་དོན་མཐོང་རྣལ་འབྱོར་བདེ། །ཞེས་ཞུས་པས། ཏེ་ལོ་པས་འདི་ཆོས་ལ་ཞེན་ནས་འདུག་དགོངས་ནས། བདེ་ནས་བདེ་བར་ངོ་སྤྲད་པའི། །བླ་མའི་གདམས་ངག་མ་ཞེན་མཛོད། །ཅེས་(ཞེས་)གསུངས། ལུས་ལ་བུམ་པའི་དབང་བསྐུར་ནས། །སྣོད་བཅུད་ལྷ་དང་ལྷ་མོའི་དལ། །ལྷ་སྐུ་སྣང་ལ་རང་བཞིན་མེད་པ་ལ་ངོ་སྤྲད། །ངག་ལ་གསང་བའི་དབང་བསྐུར་ནས། ཟག་པ་མེད་པའི་བདེ་བ་ལ་ངོ་སྤྲད། སེམས་ལ་ཤེས་རབ་ཡེ་ཤེས་ཀྱི་དབང་བསྐུར་ནས། རང་རིག་ལྷན་ཅིག་སྐྱེས་པའི་དོན་གྱི་ཡེ་ཤེས་ངོ་སྤྲད་དོ། སྒོ་གསུམ་ཚོགས་པ་ཅིག་(གཅིག་)ལ་དབང་བཞི་བསྐུར་ནས། ཕྱག་རྒྱ་ཆེན་པོ་བརྗོད་མེད་དུ་ངོ་སྤྲད་དོ། །དེ་ནས་རས་ཡུག་ཅིག་(གཅིག་)གི་སྣ་ལ་མེ་སྟག་ཅིག་ཕོག་པས། རས་དེ་ཐུལ་གྱིས་ཚིག་པ་དང་། དེ་གོ་འམ་གསུང་། དབང་གསུམ་པའི་ཡེ་ཤེས་སྐད་ཅིག་མ་དེས། འཁོར་བའི་རྣམ་རྟོག་རས་ཡུག་ལྟར་བསྲེག་པར་གོ་ནས། དབང་དོན་མེ་སྟག་ལྟ་བུ་དེས། ཉོན་མོངས་རས་ཡུག་ལྟར་བསྲེག་པ་དེ། །ཞེས་པའོ། །
༈ གྲོལ་ལམ་ཐབས་ཀྱི་སྒྲོན་མེ་བལྟམ་པ།
གྲོལ་ལམ་ཐབས་ཀྱི་སྒྲོན་མེ་འདི། དཀའ་བ་ཆེན་པོ་བཅུ་གཉིས་སྤྱད་པའི་དང་པོ་ཨོ་ཏན་ཏྲ་གཙུག་གི་ནོར་བུའི་རྒྱ་ཕིབས་ཁ་ནས་འཆོངས་པའི་དུས་ཡིན་ཏེ། ལུས་རོ་བཞིན་དུ་སོང་བའི་དུས་སུ། རྣམ་སྨིན་ལུས་ཀྱི་རྒྱ་མདུད་འདི། །འདམ་བུ་ལྟར་བཅོམ་རང་བཞིན་ནོ། །ཞེས་པས། རྣམ་སྨིན་ལུས་ཀྱི་རྒྱ་མདུད་འདི། །ཆག་ཀྱང་རུང་ངོ་ན་རོ་པ། །རྒྱུད་པ་སེམས་ཀྱི་མེ་ལོང་ལྟོས། །ཅེས་གསུངས་ནས། དེའི་དུས་སུ་བཀའ་བཞི་རྒྱུད་པའི་གདམ་ངག་གནང་ངོ་། །
1-1-72b
དེ་ནས་ལོ་གཅིག་ཙམ་ན། ཆུ་སྲིན་བུ་པད་པས་གང་བ་ལ་ཟམ་པ་བྱས་པས། སྲོག་ཆགས་པད་པ་ཟང་ཐལ་གྱིས། རང་དབང་མེད་པར་བདག །སྡུག་བསྔལ་བྱས་ཞུས་པས། རྣམ་སྨིན་ལུས་ཀྱི་ཆུ་རྒྱུན་འདི། །ཕུག་ཀྱང་རུང་གི་ན་རོ་པ། །ཐུན་མོང་སེམས་ཀྱི་མེ་ལོང་ལྟོས། །ཞེས་གསུངས་སྟེ། སྐྱེད་པའི་རིམ་པའི་གདམས་ངག་མཐའ་དག་མ་ལུས་པར་རྫོགས་པའོ། །དེ་ནས་ཡང་དུས་ཅིག་གིས་ཚེ་མེ་ཆེན་པོ་གསུམ་སྒྱེད་ཁར་སྤུངས་སྟེ(ཏེ)། འདིའི་དབུས་སུ་སྡོད་གསུང་ནས་བསྡད་པས་ཤ་ཐམས་ཅད་ཚིག་ནས་རྣམ་ཤེས་དང་མ་བྲལ་ཙམ་ན་ཏེ་ལོ་པ་བྱོན་ནས་ན་འམ་གསུངས་པ་དང་། རྣམ་པར་སྨིན་པའི་ལུས་པོ་འདི། །འབྱུང་བའི་མེ་བསྲེགས་བདག་སྡུག་བསྔལ། །ཅེས་བྱས་པས། རྣམ་པར་སྨིན་པའི་རང་ལུས་འདི། །ཚིག་ཀྱང་རུང་གིས་ན་རོ་པ། །དམ་ཚིག་ཡིད་བཞིན་ནོར་བུར་ལྟོས་གསུང་ནས། དམ་ཚིག་ཡིད་བཞིན་ནོར་བུའི་གདམས་ངག་གནང་ངོ་། །དེ་ནས་ཡང་ལོ་ཅིག་ལོན་ཙམ་ན་གདམ་ངག་ཞུ་བྱས་པས། མེ་དང་སྙུག་མ་མར་ནག་ཁྱེར་ལ་ཤོག་ཅེས་གསུངས་ནས། དེ་གསུམ་ཁྱེར་འོངས་ནས་ན་རོ་པས་རྩར་བསྡད་པས། ཐུར་མ་ལ་མར་ནག་བྱུགས་པས། མེ་ལ་སྲོས་ཅིང་ལུས་ལ་བརྒྱབ་པས། གཡས་ནས་གཡོན་དུ་ཕྱུང་གཡོན་ནས་གཡས་སུ་ཕྱུང་ནས་རྒྱབ་ནས་མདུན་དུ་ཕྱུང་སྟེ། དེའི་དུས་སུ་གཟུང་འཛིན་གཉིས་ཀྱི་ཕུང་པོ་འདི། །བླ་མས་གཤིག་ཀྱང་བདག་སྡུག་བསྔལ་ཞེས་ཞུས་པས། ཏེ་ལོ་པའི་ཞལ་ནས། གསང་སྔགས་ཡིད་བཞིན་ནོར་བུ་ཡིས། །བདེ་དྲོད་ཡིད་ཀྱི་མེ་ལོང་ལྟོས། །ཅེས་(ཞེས་)གསུངས་ནས། ངར་འཛིན་ལུས་ཀྱི་རྒྱ་མདུད་འདི། །ཞིག་ཀྱང་རུང་གི་ན་རོ་པ། །མཁའ་
1-1-73a
འགྲོ་མའི་གསང་བའི་གནས་གཏུམ་མོ་ཡེ་ཤེས་མེ་སྦོར་གྱི་གདམ་ངག་དང་། སྤྱིར་ཡང་གཏུ་གཏུམ་མོའི་གདམ་ངག་དེའི་དུས་སུ་གནང་ངོ་། །དེ་ནས་ཡང་ལོ་ཅིག་ལོན་ཙམ་ན། ནེའུ་སིང་ཅིག་གི་སྟེང་དུ་ཕྱིན་པས་མེ་ཏོག་མང་པོ་འདུག་པ་ལ། ཏེ་ལོ་པས་མེ་ཏོག་འཕྲེང་བ་གསུམ་སྦྲེལ་ནས་ན་རོ་པ་ལ་གཏད་དེ། དེ་ལུང་པའི་མདོ་འདིར་བག་མ་ཅིག་འོང་བས་ཁྱོད་ཀྱིས་བློན་པོའི་བག་མ་དེ་ལ་མེ་ཏོག་འཕྲེང་བ་འདི་ཐོགས་དང་། ཁོང་དགའ་ནས་འོང་བས་དེར་བག་མའི་ནུ་མ་ཉེད་ཟེར། དེ་ལྟར་བྱས་པ་གཉེ་བོས་ངེད་རྩ་ན་ཡོད་བཞིན་དུ་འདི་ལྟར་བྱེད་པ་ཟེར་ནས་བརྡུངས་པས་འགུལ་མ་ནུས་པ་ལ་ཏེ་ལོ་པ་བྱོན་ནས་ཅི་ཉེས་གསུང་། གཉེའ་བོས་ལྷ་བཟོའི། ཅི་ལྟར་བཏགས་པས་བདག་སྡུག་བསྔལ། །ཞེས་བྱས་པས། ཏེ་ལོ་པས། ངར་འཛིན་ལུས་ཀྱི་བདུད་རྩི་འདི། །བཏགས་ཀྱང་རུང་གིས་ན་རོ་པ། །མཁའ་འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུ་ཡི། །རྣམ་གྲོལ་སེམས་ཀྱི་མེ་ལོང་ལྟོས། །ཅེས་གསུང་(གསུངས་)ནས། འོད་གསལ་གྱི་གདམས་པ་མ་རིག་མུན་སེལ་དང་། གཞན་ཡང་གསུངས་ཏེ་བྱིན་གྱིས་བརླབས་པའོ། །ཡང་དུས་ཅིག་ན་ནགས་ཁྲོད་ཅིག་ཏུ་དགོན་པ་བྱས་བཞུགས་པ་ལ། ན་རོ་པས་བསོད་སྙོམས་བྱས་ནས་འདྲེན་པ་ལ། མི་ཅིག་ཆོས་སྟོན་བྱེད་པ་དང་ཕྲད་དེ། དེར་བསྐྲུས་པས་ཟས་རོ་མཆོག་དང་ལྡན་པ་ཅིག་འདུག་སྟེ། ངས་བཟའ་བར་འཕངས་སྙམ་ནས་ཁྱེར་ནས་འོངས་ཏེ། བླ་མ་ལ་དྲངས་པས་ཀན་སྒྲ་དང་བཅས་པས་གསོལ་ནས་དགྱེས་ཏེ། ན་རོ་པས་ག་རེ་ངའི་བླ་མ་འདི་ལ་ཅི་བྱས་ཀྱང་མགུ་བ་མེད་པ་ལ། ད་རེས་དགྱེས་པས་ད་རུང་བཅོལ་ལམ་སྙམ་ནས་ད་རུང་བཙལ་ལམ་ཞུས་པས། རུང་གསུང་ནས་སྔར་གྱི་སར་ཕྱིན་པས། 
1-1-73b
མི་ཀུན་གྱེས་ནས་འདུག་པ་ལ་ནང་དུ་བལྟས་པས་སྣོད་ཅིག་ན་བག་ཙམ་འདུག་པ་དེ་ཁྱེར་ནས་བྲོས་པས། དེའི་ཁྱིམ་བདག་གི་མི་མང་པོས་བདས་པས་བླ་མས་བསྐུར་བའི་སྔར་ནས་ཀྱིས་སྤྱོད་པའི་རྟེན་འབྲེལ་ཁ་ཅིག་ཡོད་པ་དེ་ལས། མེ་ལོང་ཅིག་ཡོད་པ་བསྐྱུར་བས་མཚོན་ཆེན་པོ་ཅིག་ཏུ་སོང་བས་ཁོང་གིས་མཐར་པའི་བར་དུ་བྲོས། ཡང་ཁོང་གིས་མ་ཧེའི་ཀོ་བ་བཏང་ནི་སླེབ་པ་དང་། ལྕགས་སྒྲོག་ཅིག་ཡོད་པ་དེ་སྐྱུར་བས་རི་ཅིག་ཏུ་གྱུར་པས་བར་བཅད་ནས་བྲོས་སོ། །ཡང་རི་ལ་འཛེགས་ནས་བྱུང་བ་ལ། ཐག་པ་ཅིག་བསྐྱུར་བས་ཆུ་ཆེན་པོ་ཅིག་ཏུ་སོང་། དེ་ལ་ཡང་རྒལ་ནས་བྱུང་བས་ཤིང་གི་རལ་གྲི་ཅིག་ཡོད་པ་དེ་གཡུགས་པས་ལྕགས་ཀྱི་སྤྱིལ་པོ་ཅིག་ཏུ་གྱུར་པའི་ནང་ན་བཞུགས་པ་ལ། ཙནྡྣ་གྱི་སྡོང་པོ་མང་པོ་ཁྱེར་ནས་བྱུང་བས་ལྕགས་ཀྱི་ཐ་མ་བསྐོར་ནས་བརྩིགས་ཏེ། ཕྱོགས་ཐམས་ཅད་ནས་མེ་བུས་པས། སྤྱིལ་པོ་ལྕགས་སྲེགས་སུ་གྱུར་ནས་མ་བཟོད་དེ་ཕྱིར་བྱུང་བས་མི་རྣམས་ཀྱིས་བརྡུངས་ནས་ཡོད་པའི་དུས་སུ། དེར་ཏེ་ལོ་པ་བྱོན་པའི་གསུང་ནས་ཅི་ཉེས་གསུངས་པ་ལ། ན་རོ་པས། འབྲས་བཞིན་དུ་བརྡུངས་ཏིལ་བཞིན་དུ། །བརྩིར་བཞིན་མགོ་འཁྱོམས་བདག་སྡུག་བསྔལ། །ཞེས་ཞུས་པས། ཏེ་ལོ་པའི་ཞལ་ནས། ངར་འཛིན་ལུས་ཀྱི་ཟངས་ཁོག་འདི། །བཅོམ་ཡང་རུང་གིས་ན་རོ་པ། །འགྱུར་མེད་བདེ་བའི་མེ་ལོང་ལྟོས་གསུང་ནས། བདེ་དྲོད་བོགས་འདོན་དང་། རྨི་ལམ་འཁྲུལ་པ་རང་སངས་ཀྱི་གདམ་ངག་གསུངས་སོ། །ཡང་རྗེས་སུ་འབྲངས་ཞིང་ཕྱིན་པས། ཐང་སྟོང་པ་ཅིག་ལ་མི་ཅིག་གིས་ཁུར་པོ་ཁྱེར་ནས་སོང་བ་ལ། འདི་དེད་གསུངས་པས་སྨིག་རྒྱུ་བཞིན་ཇི་རིང་གིས་སོང་བས། ངལ་ཅིང་ཆད་པར་གྱུར་པ་དང་ཏེ་
1-1-74a
ལོ་པ་བྱོན་ནས་ཅི་ཉེས་གསུང་། ན་རོ་པས། རི་དྭགས་སྨྱིག་རྒྱུ་བརྡས་པ་བཞིན། །མེད་ནས་རིང་སོང་བདག་སྡུག་བསྔལ། །ཞེས་ཞུས་པས། ཏེ་ལོ་པའི་ཞལ་ནས། ཁམས་གསུམ་འཁོར་བའི་རྒྱུན་ཐས་འདི། །ཆད་ཀྱང་རུང་གིས་ན་རོ་པ། །སྒྱུ་མ་རྣམ་གྲོལ་མེ་ལོང་ལྟོས། །གསུང་ནས་སྒྱུ་ལུས་ཆོས་བརྒྱད་རང་གྲོལ་གྱིས་(གྱི་)གདམ་ངག་དང་། སྤྱིར་སྒྱུ་ལུས་ཀྱིས་(ཀྱི་)གདམས་པ་ཐམས་ཅད་མཐའ་དག་གདམས་སོ། །ཡང་ལོ་ཅིག་ལོན་ཙམ་ན། རྒྱལ་པོའི་བུ་མོ་ཅིག་འདོ་ལི་ལ་བཏེག་ནས་བྱུང་བ་ཏེ་ལོ་པས་འདི་ལ་འཇུས་གསུང་ནས། ན་རོ་པས་འཇུས་པས། བློན་པོའི་ཚོགས་ཀྱིས་དབུགས་ཀྱི་རྒྱུ་བ་མ་ཆད་པ་ཙམ་བརྡུངས་པས། ཡང་ཏེ་ལོ་པ་བྱོན་ནས་ཅི་ཉེས་གསུང་། ན་རོ་པས། བློན་པོ་བརྩེ་མེད་ལྟོ་བཟའི། །རྩི་བཞིན་བཏགས་པས་བདག་སྡུག་བསྔལ་ཞེས་ཞུས་པས། ཏེ་ལོ་པའི་ཞལ་ནས་ངར་འཛིན་ལུས་ཀྱིས་རི་བོ་འདི། །ཆག་ཀྱང་རུང་གི་ན་རོ་པ། །གཡོ་མེད་ཡུལ་འཇུག་མེ་ལོང་ལྟོས། །ཞེས་གསུངས་ནས། གྲོང་འཇུག་སྦྲུལ་ཀོགས་(ཀོག་)འདོར་བྱེད་དང་། སྤྱིར་ཡང་གྲོང་འཇུག་གི་གདམས་པ་མཐའ་དག་གནང་ངོ་། །ཡང་བླ་མའི་རྗེས་སུ་འབྲེངས་ནས་ཕྱིན་པས། རྗེ་ཏེ་ལོ་པའི་ཞལ་ནས་རྒྱལ་པོའི་བཙུན་མོ་ཁུག་ཅིག་གསུང་། ན་རོ་པས་རྒྱལ་པོའི་བཙུན་མོ་བཀུག་པས་རྒྱལ་པོའི་ཁྲིམས་ཕོག་ནས། རྒྱོགས་ཀྱི་འཁྲུལ་འཁོར་དུ་བཅུག་ནས་འཕངས་པས། ལུས་པོ་ཐམས་ཅད་དུམ་བུ་དུམ་བུར་སོང་བ་ལ་དབང་པོ་ཅུང་མ་ཤོར་ཙམ་ན། ཡང་ཏེ་ལོ་པའི་ཞལ་ནས། ཁྱོད་མ་བདེ་འམ་གསུང་། རྒྱལ་པོའི་གཞུ་ཡིས་བདག་དེ་ཉིད། །མདའ་བཞིན་འཕངས་ཏེ་བདག་སྡུག་བསྔལ། །ཞེས་
1-1-74b
ཞུས་པས། ཏེ་ལོ་པའི་ཞལ་ནས། ངར་འཛིན་ལུས་ཀྱི་རི་བོ་འདི། །ཆག་ཀྱང་རུང་གིས་ན་རོ་པ། །རང་གྲོལ་སེམས་ཀྱི་མེ་ལོང་ལྟོས། །ཞེས་གསུང་ནས། གཉིས་མེད་དབང་གི་དོན་ལ་ངོ་སྤྲོད་པ་དང་། འཁོར་འདས་རྒྱུན་གཅོད་ཀྱི་གདམས་པ་གནང་སྟེ་དཀའ་བ་དགུ་པ་རྫོགསྷོ།། །།ཡང་དུས་རེ་ཤིག་ན་བློན་པོའི་བཙུན་མོ་ལ་འཇུས་ཅིག་གསུང་ནས། དེ་ལྟར་བྱས་པས། བློན་པོ་རྣམས་ཀྱིས་ཡན་ལག་བཞི་བཅད་ནས་སོ་སོར་བསྒྱུར་ཏེ་དབུགས་ཡོད་པ་ཙམ་པ་ལས། ད་ནི་མི་སོས་སྙམ་ཏེ། བླ་མ་ལ་དད་གུས་ཆེ་བར་ཡོད་པས། ཡང་ཏེ་ལོ་པ་བྱོན་ནས་ཅི་ཉེས་གསུངས་པ་ལ། རི་དྭགས་སྐྱབས་མེད་ཇི་བཞིན་དུ། །མགོན་མེད་བདེ་བཅོམ་བདག་སྡུག་བསྔལ། །ཞེས་ཞུས་པས་རྗེ་ཏེ་ལོ་པའི་ཞལ་ནས། ངར་འཛིན་ལུས་ཀྱི་རི་དྭགས་འདི། །བསད་ཀྱང་རུང་གི་ན་རོ་པ། །སྐྱེ་ཤི་མེད་པའི་རང་ལུས་ལ། །འཆི་མེད་སེམས་ཀྱི་མེ་ལོང་ལྟོས། །ཅེས་(ཞེས་)གསུངས་ཏེ། ཡན་ལག་རེ་རེ་ནས་སྦྱར་ཏེ་སེ་གོལ་གཏོག་པས་སོས་པར་གྱུར་ཏོ། །སྤྱིར་ཡང་བར་དོའི་གདམས་པ་མཐའ་དག་གནང་ལ། ཁྱད་པར་དུ་བར་དོ་ཆོས་སྐུ་ངོ་སྤྲོད་ཀྱི་གདམས་པ་དགའ་བ་བཅུ་པ་ལ་གནང་བའོ། །ཡང་ཏེ་ལོ་པས་ནཱ་རོ་པ་ལ་བུད་མེད་མཚན་ལྡན་ཅིག་གཏད་དེ། ཕྱག་རྒྱ་མོ་གྱིས་གསུང་ནས་དེ་ལྟར་བྱས་པས། ཡུན་ཨེན་ཅིག་འགྲོགས་པས་བུད་མེད་ཀྱི་སྐྱོན་རྣམས་མཐོང་བས། གཉིས་སྣང་ཡུལ་གྱི་གཟུང་འཛིན་གྱིས། །འབད་པ་དུ་མས་བདག་སྡུག་བསྔལ། །ཞེས་ཞུས་པས། ཏེ་ལོ་པའི་ཞལ་ནས། འཁོར་དང་མྱང་འདས་དབྱེར་མེད་ལ། །འབད་ཀྱང་རུང་གིས་ན་རོ་པ། །མཁའ་
1-1-75a
འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུའི། །སྤྲོས་མེད་སེམས་ཀྱིས་དོན་སྟོན་པ། །སྙིང་པོ་དོན་གྱིས་གདམས་པ་སྟེ། །བདེ་ཆེན་སེམས་ཀྱིས་མེ་ལོང་ལྟོས། །ཅེས་གསུངས་པས། དཀའ་བ་བཅུ་གཅིག་པ་ལ་གཞན་ལུས་ཤེས་རབ་ལ་རྟེན་པའི་གདམས་པ་མ་ལུས་པ་གནང་ངོ་། །ཡང་ཏེ་ལོ་པའི་ཞལ་ནས། ཁྱོད་ཀྱི་ཕྱག་རྒྱ་མ་ང་ལ་ཕུལ་ཅིག་གསུང་ནས་ན་རོ་པས་ལྟོས་པ་མེད་པར་ཕུལ་བས། ཁྱོད་བདེ་འམ་གསུངས་པ་ལ། ལྟོས་མེད་བླ་མ་སངས་རྒྱས་ལ། །ཤེས་རབ་ཡོན་ཕུལ་ན་རོ་པ་དེ། །ཞེས་བརྗོད་པས། ཡང་ཏེ་ལོ་པའི་ཞལ་ནས། ཆོས་ཀྱི་དབྱིངས་ཀྱིས་ཀློང་ནས་ནི། །བདེ་ཡང་རུང་གི་ན་རོ་པ། །མཁའ་འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུའི། སྤྲོས་མེད་སེམས་ཀྱི་མེ་ལོང་ལྟོས། །ཞེས་གསུངས་ནས། དཀའ་བ་བཅུ་གཉིས་པ་ལ་འཕོ་བ་གསེར་འགྱུར་རྩིའི་གདམས་པ་གནང་ངོ་། །
༄། །གསང་བ་གཅེས་འཕངས་འབུལ་བྱེད་ཀྱི་དཀའ་བ་ལ་བརྟེན་ནས་ཐབས་ཀྱི་སྒྲོན་མེ་བལྟམས་པ།
གསང་བཙེས་(བ་གཅེས་)འཕངས་དབུལ་(འབུལ་)བྱེད་ཀྱི་དཀའ་བ་ལ་བརྟེན་ནས་བདེ་བའི་སྒྲོན་མེ་ལྟམས་(བལྟམས་)པ་དང་།
༈ ཟག་པ་མེད་པའི་སྒྲོན་མེ་སྤར་བ།
ཟག་པ་མེད་པའི་སྒྲོན་མེ་ལྟམ་པ་ནི། དེ་ལྟར་ལོ་ཡང་བཅུ་གཉིས་སོང་དཀའ་བ་ཡང་བཅུ་གཉིས་སྤྱད་ནས། ནད་ཀྱི་ཐ་མ་ལ་བླ་མའི་ཞལ་ནས། མཎྜལ་ཕུལ་ཅིག་གསུངས་ནས། དེར་རང་གིས་ལྟོས་པ་མེད་པར་ས་ལ་ཁྲག་གིས་ཆག་ཆག་བཏབ། མིག་དང་རྣ་བ་དང་སྣ་དང་ལྕེ་དང་། ལུས་ཀྱི་དབང་པོ་ལྔ་ཚོམ་བུ་བཀོད་དེ་རས་ཆུང་བའི་བཞེད་པས། མགོ་བཅད་པ་དཀྱིལ་དུ་བཞག །ཡན་ལག་དང་ཉིན་ལག་ཕྱོགས་བཞི་མཚམས་བརྒྱད་དུ་བཞག་ནས་ཕུལ་ལོ་ཅེས་(ཞེས་)ཟེར་རོ། །དེར་རྗེ་བཙུན་ཏེ་ལོ་པས། ན་རོ་པ་ལ་བདེ་འམ་བྱས་པས། ན་རོ་པས། ཟག་
1-1-75b
བཅས་ལུས་ཀྱི་མཎྜལ་ནི། །བླ་མ་ལ་ཕུལ་ན་རོ་བདེ། །ཞེས་ཞུས་པས། ཏེ་ལོ་པའི་ཞལ་ནས། ཟག་བཅས་སྙིང་པོ་མེད་ཀྱི་ལུས། །ཕུལ་ཡང་རུང་གི་ན་རོ་པ། །དངོས་པོ་མེད་པའི་དབྱིངས་ནས་ནི། །བདེ་ཡང་རུང་གིས་ན་རོ་པ། །མཁའ་འགྲོ་མའི་གསང་བའི་གནས། །གསང་སྔགས་ཡིད་བཞིན་ནོར་བུའི། །གཉིས་མེད་སེམས་ཀྱིས་(ཀྱི་)མེ་ལོང་ལྟོས། །ཞེས་གསུངས་ནས། མ་རིག་མུན་པར་སྟོངས་གྱུར་པའི། །དམུས་ལོང་བདག་གིས་ཇི་ལྟར་བལྟ། །ཞེས་ཞུས་པས། ལྟ་བ་མེད་པའི་ཚུལ་དུ་ལྟོས། །མཐོང་བ་མེད་པའི་ངང་ཉིད་ལ། །དོན་མཐོང་རྣལ་འབྱོར་རང་གྲོལ་འགྱུར་གསུངས་པས། ན་རོ་པ་ལ། སྐད་ཅིག་མ་ལ་རྟོགས་པ་སྐྱེས་ནས་ལན་བཏབ་པ་རང་སེམས་ནོར་བུ་རིན་པོ་ཆེ། །བླ་མའི་གྲུ་རྫིངས་ལ་རྟེན་(བརྟེན་)ནས། །ཁམས་གསུམ་འཁོར་བའི་རྒྱ་མཚོ་ལས། །གཉིས་མེད་དོན་མཐོང་རྣལ་འབྱོར་བདེ། །ཞེས་ཞུས་པས། ཏེ་ལོ་པས་གདམས་པ་ལ་ཞེན་ནས་འདུག་དགོངས་ནས། བདེ་ནས་བདེ་བར་ངོ་སྤྲད་པའི། །བླ་མའི་གདམས་ངག་ལ་འང་མ་ཞེན་མཛོད་ཅེས་གསུངས་སོ། །ཡང་ན་རོ་པའི་ཞལ་ནས། ཡེ་ཤེས་མེ་སྟག་ལྟ་བུ་ཡིས། རྣམ་རྟོག་རས་ཡུག་ལྟར་བསྲེགས་བདེ་ཞུས་པས། དེ་ལྟར་གཉིས་སུ་མེད་པའི་དོན་ངོ་སྤྲད་ནས་ཕྱག་རྒྱ་ཆེན་པོའི་དོན་ལ་རྟོག་(རྟོགས་)པ་ཤར་ནས་རྩོལ་སྒྲུབ་དང་བྲལ་བར་གྱུར་པ་སྟེ། དཀའ་བ་མཐར་ཕྱུང་བའོ། །
༄། །དེ་ཁོ་ན་ཉིད་བཀའ་ཉན་གསུང་སྡོད་ཀྱི་དཀའ་བ་ལ་བརྟེན་ནས་འབྲས་བུ་མངོན་དུ་གྱུར་པ།
རྟེན་འབྲེལ་ལུགས་འབྱུང་ལུགས་ཟློག་རྟོགས་པ་དང་། མུ་ཏིག་དང་བྱི་རུའི་མེ་ཏོག་འབུལ་བ་མཛད་ནས། དེའི་རྗེས་ལ་དེ་ཁོ་ན་ཉིད་དཀའ་ཉན་གསུང་སྡོད་ཀྱི་དཀའ་བ་ནི། སྤྱོད་པ་མཐར་ཕྱུང་སྟེ། ན་རོ་པས་བླ་མ་ལ་ཕྱི་ཕྱག་འཚལ་ནས་བཞུད་དེ། རྒྱལ་པོ་ཟླ་དབང་གི་མཆོད་གནས་མཛད་ནས་སྒོམ་ཞིང་བཞུགས་
1-1-76a
པ་ལ། །བླ་མ་ཏེ་ལོ་པས་ནམ་མཁའ་ལ་བྱོན་ནས། འདི་སྐད་དུ་བསྡད་པས་དམུན་ལོང་གཟུགས་མི་མཐོང་བསྡད་བསྡད་པས་འོན་པས་སྒྲ་མི་ཐོས་པས་ལྐུག་པས་དོན་མི་གོ། །བསྡད་པའི་ཞ་འོས་རྗེས་མི་སླེབ། །བསྡད་པས་སྡོང་པོ་རྩ་མི་རྟེན(བརྟེན)། །བསྡད་པས་ཕྱག་རྒྱ་ཆེ་མ་རྟོགས། །ཞེས་གསུངས་པས། ན་རོ་པས་གོང་ནས་གོང་དུ་བོགས་འདོན་པའི་རྩལ་སྦྱངས་པའི་ཕྱིར། སྤྱོད་པ་གྱིས་གསུངས་པ་ཡིན་དགོངས་ནས། རས་ཀྱི་ཨང་ག་ར་སྐུ་ལ་གསོལ། ཐོད་པ་ཅིག་(ཞིག་)བཟུང་ནས་ཐམས་ཅད་ལ་བླང་བླང་བྱས་པས། བྱིས་པ་བརྡའ་ཤིན་མཁས་པ་ཅིག་(ཞིག་)གིས་ཆུ་གྲི་རྣོན་པོ་ཅིག་(ཞིག་)ཐོད་པའི་ནང་དུ་ཅུག་(བཅུག་)པས་དེ་ལྟམས་(ལྟེམ་)གྱིས་བཞུ་ནས་གསོལ་བས་ཐམས་ཅད་ངོ་མཚར་སྐྱེས་ཏེ། ཅིག་(གཅིག་)ནས་གཉིས་སུ་རྒྱུད་པས་རྒྱལ་པོས་གསན་པས་རྣལ་འབྱོར་པ་ཅི་ལྟ་བུ་ཡིན་ལྟ་དགོས་ཟེར་ནས། དམག་དཔུང་བཞི་ན་རོ་པའི་སྟེང་དུ་བཏང་བས། ན་རོ་པས་ལྟ་སྟངས་ཀྱིས་བསད། གླང་པོ་ཆེ་སྙོན་པ་ལ་གར་ཆང་གླུད་ནས་བཏང་བས་ལྟ་སྟངས་ཀྱིས་བསད། དེ་ལྟར་མཛད་པས་དམག་མིའི་ཕ་མ་སྡུག་བསྔལ་བར་གྱུར་ནས། གླང་པོ་ཆེ་ཤི་བས་ཡུལ་གྱི་མི་ཐམས་ཅད་སྡུག་བསྔལ་བར་གྱུར་པ་ལ། བླ་མའི་ཞལ་ནས་ཡུལ་མི་རྣམས་ལ་ཤིན་ཏུ་རིང་བའི་ས་ཅིག་(ཞིག་)ཏུ་གླང་པོ་ཆེ་ཤོང་པའི་དོང་ཅིག་(ཞིག་)བྲུས་གསུང་། ན་རོ་པས་གླང་པོ་ཆེ་ལ་གྲོང་འཇུག་བྱས་ནས་བྲུས་པའི་དོང་དུ་བསྐྱལ་བས་ཡུལ་མི་རྣམས་དགའ་བར་གྱུར་ཏོ། །དེ་ནས་ན་རོ་པ་ལ་རྒྱལ་པོས་མཆོད་གནས་ཞུས་པས། རྒྱལ་པོའི་བུ་མོ་ཡང་ཕུལ་བས། ན་རོ་པས་རྔོན་པ་ལ་སོགས་པ་སྤྱོད་པ་མི་འདྲ་བ་སྣ་ཚོགས་བྱས་པས། བུ་མོ་ལ་ཕྱིར་སོང་བྱས་པས་
1-1-76b
མཉན་ཏེ་རྣལ་འབྱོར་པ་བཟང་པོ་བཟང་པོ་ཡིན་ཟེར་སྐད། དེར་གཉིས་ཀ་སྐུ་ཁ་སྦྱར་དུ་བཅུག་ནས་ཙནྡྣ་གྱི་སྡོང་པོའི་རྩིག་པ་བྱས་ཏེ། དེའི་ཐ་མ་མེ་རིའི་ར་བ་དང་རལ་གྲིའི་འཁོར་ལོ་དང་ཉ་རྒྱ་ལ་སོགས་པ་སྐོར་བའི་ནང་དུ་ཙནྡྣ་གྱི་སྡོང་པོ་ལ་མེ་བཏང་བས་དུད་པ་ནམ་མཁའ་ལ་སོང་བས་མེ་ཕྱུར་རུ་རུ་འབར་ཏེ་མེའི་ནང་ན་གར་མཛད་ཅིང་། ཞག་བདུན་གྱི་ནང་པར་ད་ནི་ཤི་ནས་རུས་པ་ཡང་མ་ལུས་སྙམ་ཙ་ན། རྡོ་རྗེ་དྲིལ་བུ་ཐོགས་ནས་ནམ་མཁའ་ལ་ཕར་ཡབ་ཡུམ་ཞལ་སྦྱར་ཏེ། ཧེ་རུ་ཀའི་རྣམ་པར་འཇའི་རང་བཞིན་དུ་ཝལ་གྱིས་གསལ་བར་ཞུགས་ནས་འདི་སྐད་གསུངས་ཏེ། ཙནྡྣ་མེའི་འཁོར་ལོ་འདི། །ངར་འཛིན་འགོང་པོ་བསྲེག་པའི་གྲོགས། །མཚོན་ཆ་རྣོན་པོའི་འཁོར་ལོ་འདི། །འཁོར་བའི་རྒྱུན་ཐག་གཅོད་པའི་གྲོགས། །མནར་སེམས་ལས་ཀྱི་རྒྱ་མདུད་འདི། །དུག་གསུམ་མདུད་པ་འགྲོལ་བའི་གྲོགས། །ངན་སྨྲ་ཚིག་རྩུབ་མཚོན་ཆ་འདི། །བཟོད་པའི་ཕུབ་ཆུང་འཛུགས་པའི་གྲོགས། །ཡོན་མཆོད་ཁྲིམས་ཀྱི་ཐོ་བ་འདི། །ངར་འཛིན་འགོང་པོ་བརྡུང་བའི་གྲོགས། །ལྟོས་མེད་གཞན་སྲོག་གཅོད་བྱེད་པ། །སྡོམ་གསུམ་དག་དང་མི་འབྲལ་ཞིང་། །ངན་སོང་གནས་སུ་མི་སྐྱོ་ན། །ན་རོ་པའི་གྲོགས་སུ་བདེ། །ཞེས་གསུངས་སོ། །དེར་རྒྱལ་པོ་འགྱོད་པ་སྐྱེས་ཏེ་བཟོད་གསོལ་བྱས་པ། བསྟན་པ་སྡེ་འཁྲུགས་མེར་བསྲེགས་ཅིང་། །བསྐལ་པ་དུས་མཐའི་མེ་དང་ནི། །རང་རྒྱུད་གཟུང་འཛིན་མེས་བསྲེགས་ནས། །ཆོས་རྒྱལ་མྱ་ངན་མེད་པ་ཡིས། །ཞུས་པའི་དོན་རྣམས་རྨི་ལམ་ལས། །མི་ཚངས་ཉེས་རྣམས་བཟོད་པར་གསོལ། །ཞེས་བཟོད་གསོལ་བྱས་པས། །ཡང་ན་རོ་པའི་ཞལ་ནས། བརྩོད་ཆེན་གསུང་དང་སྙིང་པོ་ཉམས། །ཤན་གྱིས་གནོད་
1-1-77a
པར་གྱུར་པ་ལས། །དེ་དག་མི་གནོད་པར་ཤེས་བྱ། །ཡུལ་སྤངས་བྱོལ་ཏེ་སྦྱངས་པ་དང་། །དངོས་པོ་བསམས་ཏེ་རྣམ་སྨིན་བྱང་། །དོན་རྟོགས་ཐ་སྙད་བྲལ་བ་དང་། །དོན་ཆེན་ལྡན་དང་བསྒྲུབ་མ་ནུས། །ཉེས་མེད་དག་ཏུ་ཤེས་པར་བྱ། །སྐྱེ་མེད་དོན་རྟོགས་ཀུན་ལའོ། །བླ་མ་བརྙས་དང་བཀུར་(སྐུར་)བཏབ་དང་། །དགེ་འདུན་བསྐོར་(དཀོར་)ལ་གཉེན་པོ་མེད། །ཅེས་གསུངས་པས། ཡང་རྒྱལ་པོ་ན་རེ། ཆོས་བརྒྱད་གཞུ་ཡིས་བླ་མའི་བཀའ། །འཕངས་ཏེ་ངན་སོང་གསུམ་པོ་རུ། །རྨི་ལམ་དག་ཏུ་སྐྱེས་མཐོང་བས། །བདག་གིས་ཉེས་རྣམས་བཟོད་པར་གསོལ། །ཞེས་བྱ་སྟེ། དོན་ལ་ངས་ཁྱེད་ལ་དེ་ལྟར་བྱས་པའི་རྣམ་སྨིན་གྱིས་རྨི་ལམ་དུ་ངན་སོང་གསུམ་དུ་བསྐྱེས་(སྐྱེས་)པའི་སྣང་བ་ཤར་བས། ད་ངའི་ཉེས་པ་དེ་དག་བཟོད་པར་གསོལ། དག་པར་ཞུས་ཞེས་གསོལ་བ་བཏབ་པས། ཡང་ན་རོ་པའི་ཞལ་ནས། ཆོས་བརྒྱད་ཚེ་འདིའི་མདུད་པ་ཁྲོལ། །དུག་གསུམ་འཁོར་བའི་འདམ་རྫབ་སྐོམས། །མ་རིག་མུན་པའི་དམག་ཚོགས་བཟློག །འགྱོད་སེམས་ཡེ་ཤེས་སྒྲོན་མེ་བསྐྱེད། །བཤགས་པ་སྐྱེ་མེད་ངང་དུ་གྱིས། །ཞེས་གདམས་པ་བསྟན་པ། རྒྱལ་པོ་ཡང་བླ་མའི་བྱིན་བརླབས་(རླབས་)ཀྱིས་དེ་ཉིད་དུ་གྲོལ་བར་གྱུར་ཏེ། དེ་ནི་སྤྱོད་པ་མཐར་ཕྱིན་པའོ། །
༄། །འབྲས་བུ་མངོན་དུ་གྱུར་པ།
འབྲས་བུ་མངོན་དུ་གྱུར་པ་བླ་མའི་ལུང་བསྟན་པ་ཐོབ་པ་ནི། དེ་ནས་ཏེ་ལོ་པ་ནམ་མཁའ་ལ་སྐུ་གསལ་བར་བྱོན་ནས། རྟོགས་པ་རྟན་(བརྟན་)པར་མ་གྱུར་ཅིང་། །བླ་མ་མཁའ་འགྲོས་མ་གནང་ཞིང་། །ཉམས་མྱོང་རྟོགས་པ་མ་སྐྱེས་ན། །ཤུགས་བྱུང་ཞེན་པས་མ་གྲོལ་བར། །སྤྱོད་པ་མ་བྱེད་ན་རོ་པ། །གསུང་བས། འོ་ན་ཉན་ནམ་བཤད་དམ་བལྟ་
1-1-77b
འམ་ནི། །བསྒོམ་མམ་སྤྱོད་དམ་འབྲས་བུ་སྒྲུབ། །ཞེས་(ཅེས་)ཞུས་པས། ཡང་ཏེ་ལོ་པའི་ཞལ་ནས། ཆོས་ཉན་ལན་ཚྭའི་ཆུ་བཞིན་དུ། །སྲིད་ལས་མི་ལྡོག་ན་རོ་པ། །ཚིག་གི་སྤྲོས་པའི་ཕྲེང་བ་ལས། །དོན་ཉིད་མི་རྟོགས་ན་རོ་པ། །ཤུགས་བྱུང་ཞེན་པ་རང་གྲོལ་ལ། །ཉམས་མྱོང་བསྒོམ་མེད་ན་རོ་པ། །བློ་འདས་ཡིད་ལ་མི་བྱེད་པ། །ལྟ་བ་ལྟར་མེད་ན་རོ་པ། །གཟུང་འཛིན་ཡུལ་ལས་འདས་པ་ལ། །སྤྱོད་པ་བྱར་མེད་ན་རོ་པ། །རེ་དོགས་གཉིས་དང་བྲལ་བ་ལ། །འབྲས་བུ་དོན་མེད་ན་རོ་པ། །ཞེས་གསུངས་པས། ཡང་ན་རོ་པས་ཞུས་པས། སྣང་བ་གཟུགས་ཀྱི་ཕུང་པོ་འདི། །སྐྱེ་བ་མེད་པའི་རང་བཞིན་ལ། །གལ་ཏེ་ཡོད་ན་སྤྱོད་རིགས་ཏེ། །མེད་པར་སྤྱད་དུ་འདོད་པ་ཅི། །རང་རིག་ཤེས་པ་བདེ་གསལ་འདི། །ཅི་ཡང་མེད་པའི་སྟོང་པ་ལ། །གྲུབ་ན་ཞེས་འདོད་རིགས་པ་ལ། །གྲུབ་པ་མེད་པར་འདོད་པ་ཅི། །སེམས་ཉིད་འོད་གསལ་སྟོང་པ་ཉིད། །སྒྲོ་བཀུར་(སྐུར་)གཉིས་དང་བྲལ་བ་ལ། །སྐྱེས་ན་ཉམས་མྱོང་རིགས་པ་ལ། །མེད་པར་ཉམས་སུ་མྱོང་བ་ཅི། །ལྷུན་གྱིས་གྲུབ་པའི་བདེ་ཆེན་ལ། །དགེ་སྡིག་ཡོད་ན་བདེ་སྡུག་གཉིས། །འབྲས་བུ་སྨིན་པར་རིགས་པ་ལ། །ཐམས་ཅད་མཉམ་ཉིད་ངོ་བོ་ཉིད། །དགེ་མེད་སྡིག་པ་སྤངས་པ་ཅི། །ཞེས་ཞུས་པས། ཡང་ཏེ་ལོ་པས། སྣང་བ་རྟེན་ཅིང་འབྲེལ་འབྱུང་འདི། །སྐྱེ་བ་མེད་པར་མ་རྟོགས་པར། །ཚོགས་གཉིས་ཤིང་རྟའི་འཁོར་ལོ་དང་། །འབྲལ་བར་མ་བྱེད་ན་རོ་པ། །སྐྱེ་མེད་སྟོན་པའི་སློབ་དཔོན་དུ། །སྣང་བ་དཀར་དམར་ཤར་བ་ན། །ཤེས་པ་བྱ་རོག་རྫིངས་འཕུར་མཐོང་། །འདོད་ཡོན་སྤྱོད་ཅིག་ན་རོ་པ། །སེམས་ཉིད་རང་རིག་རང་གསལ་ལ། །སྣང་བ་འཕྲལ་བྱུང་མ་རྟོགས་པར། །ཞེན་པ་དང་བཅས་ཉམས་མྱོང་གིས། །བདག་ཉིད་
1-1-78a
འཆིང་འགྱུར་ན་རོ་པ། །གདོད་ནས་ཕྱི་ནང་ཆོས་རྣམས་ཀུན། །སྐྱེ་མེད་སྤྲོས་དང་བྲལ་བ་དང་། །ཉམས་མྱོང་དྲན་རིག་བློ་བུར་འདི། །རྫུན་པར་ཤེས་ན་ཅི་དགར་སྤྱོད། །འཁོར་བའི་མུན་པར་སྐྱེ་བ་ན། །རྣམ་རྟོག་གཟུང་འཛིན་སྣ་ཚོགས་འདི། །རྟོགས་པའི་སྟ་གྲི་རྣོན་པོ་ཡིས། །ཅི་སྣང་ཆོད་ཅིག་ན་རོ་པ། །འདོད་ཡོན་གཟུགས་སྒྲ་ལ་སོགས་ལ། །ཞེན་པ་སྐྱེ་བར་གྱུར་པ་ན། །སྦྲང་མ་རྩི་ལ་འབྱར་བ་འདྲ། །ཞེན་པ་ཐོང་ཅིག་ན་རོ་པ། །ཞེས་གསུངས་སོ། །རྡོ་རྗེ་ལུས་ཀྱི་གནས་ལུགས་ལ། །ས་ལམ་ཐམས་ཅད་རབ་རྫོགས་པས། །འཁོར་ལོ་བཞིན་དུ་བདུད་བཅོམ་པས། །སེམས་ཀྱི་རྟེན་འབྲེལ་འགྲིག་པ་ཡིས། །ཚེ་ཅིག་(གཅིག་)ལུས་ཅིག་(གཅིག་)འདི་ཉིད་ལ། །སྐད་ཅིག་ལྷན་ཅིག་སྐྱེས་རྟོགས་པས། །འོད་གསལ་ཟུང་འཇུག་མཐར་ཕྱིན་ཏེ། །རིམ་ལྔ་ཅིག་ཆར་བསྒོམས་པ་ཡིས། །རྡོ་རྗེ་ཟླས་སོགས་ནུས་པ་རྣམས། །མངོན་སུམ་ལམ་དུ་གྱུར་པ་ཉིད། །ཡོན་ཏན་རིམས་ཀྱིས་ཐོབ་པར་འགྱུར། །སྐུ་བཞི་ཡེ་ཤེས་རབ་རྫོགས་པའོ། །ཅེས་(ཞེས་)སོ། །བདག་སྐྱོན་ཟླ་བ་རབ་རིབ་རྟོགས། །ཞེན་པ་སྦྲང་མ་རྩི་ལ་འབྱར། །འདོད་ཡོན་སྤྲིན་གྱིས་ཁ་ཆུས་བཏུབས། །དུག་གསུམ་འཁོར་བའི་འདམ་རྫབ་ལ། །གནོད་སེམས་ལས་ཀྱི་རྒྱ་མདུད་དམ། །ཉམས་མྱོང་རུས་སྦལ་སྤུ་རྣམས་འཐོག །རྟོགས་པ་ནམ་མཁའི་མེ་ཏོག་ཡལ། །དམུས་ལོང་ཞེན་པ་ཅི་ལྟར་གཏང་། །ཞེས་ཞུས་པས། ཡང་ཏེ་ལོ་པས། ཧེ་རུ་ཀའི་ཆ་བྱད་རུས་པའི་བརྒྱན་(རྒྱན་)དང་ཌ་མ་རུ་དང་དབུ་སྐྲ་རལ་པའི་ཐོར་ཚུགས་བཅིངས་ནས་ཆོས་དྲུག་རྡོ་རྗེའི་འགུར་(མགུར་)དུ་བཞེངས་ནས་ལུང་བསྟན་པ། པུ་ལ་ཧ་རིའི་དགོན་པ་རུ། །འོད་གསལ་དབྱིངས་ཀྱི་ནམ་མཁའ་ལ། །ཟུང་འཇུག་གཤོག་པར་ལྡན་པའི། །འཕོ་བ་སེམས་ཀྱི་
1-1-78b
བྱང་ཆུབ་འཕུར། །བདག་ཏུ་འཛིན་པའི་ཞེན་པ་ཐོང་། །གཉིས་སུ་མེད་པའི་དགོན་པ་རུ། །སྒྱུ་མ་ལུས་ཀྱི་ཧོམ་ཁུང་ནས། །གཏུམ་མོ་བདེ་དྲོད་ཡེ་ཤེས་མེས། །རྨི་ལམ་བག་ཆགས་བུད་ཤིང་བསྲེགས། །གཟུང་འཛིན་རྟོག་པའི་ཞེན་པ་ཐོང་། །བརྗོད་དུ་མེད་པའི་དགོན་པ་རུ། །བདེ་ཆེན་ཕྱག་རྒྱ་ཆེན་པོའི། །ངོ་བོ་ལྷན་ཅིག་སྐྱེས་མཐོང་བས། །རྟོགས་པའི་མཚོན་ཆ་རྣོན་པོ་ཡིས། །བར་དོ་མིག་སར་རྒྱུན་ཐག་ཆོད། །ཆགས་ཞེན་མཚན་མའི་ཞེན་པ་ཐོང་། །ཡིད་བཞིན་ནོར་བུའི་གསེབ་ལམ་བསྒྲོད། །འགྱུར་མེད་ལྗོན་ཤིང་རྩད་ནས་ཆོད། །སྨྲར་མེད་ལྐུགས་པའི་སྨྲ་ལྕེ་བྲོགས། །བྱིན་བརླབས་(རླབས་)འཁོར་བའི་རྒྱུན་ཐག་ཆོད། །སྔར་འདྲིས་ངོ་ཤེས་མང་དུ་ཡོད། །ཀྱེ་ཧོ་འདི་ནི་རང་རིག་སྟེ། །ངག་གི་སྤྱོད་ཡུལ་ལམ་ལས་འདས། །ཏེ་ལོ་ང་ཡིས་ཅི་ཡང་བསྟན་དུ་མེད། །རང་རིག་ཡེ་ཤེས་ཡང་མཚོན་ཏེ་བྱོས། །ཞེས་གསུངས་སོ། །ཡང་ན་རོ་པས། ཡིད་ལ་མི་བྱེད་ཕྱག་རྒྱ་ཆེན་པོའི་ལམ། །སྤྲོས་བྲལ་སྒྲིབ་མེད་དྲི་བྲལ་སེམས་ཉིད་ཀྱི། །ཡེ་ཤེས་རྟོགས་པས་སུ་ལའང་དྲི་མི་བྱ། །གཉིས་མེད་ཤུགས་བྱུང་རྣལ་འབྱོར་རང་གྲོལ་ཡིན། །ཞེས་བརྗོད་དེ། རྟོགས་པ་མཆོག་ཏུ་གྱུར་ཏེ། དེ་ནས་རྗེ་བཙུན་ཏེ་ལོ་པས། རྗེ་མར་པ་ལོ་ཚ་(ཙྰ་)སྣོད་ལྡན་དུ་ལུང་བསྟན་པ། རང་གྲོལ་ཡེ་ཤེས་ཉི་མ་ཡིས། །པུ་ལ་ཧ་རིའི་དགོན་པ་རུ། །ཁ་བ་ཅན་གྱིས་(གྱི་)སྐལ་ལྡན་པ། །བྷོ་ཏའི་མ་རིག་མུན་སེལ་ལ། །ཡེ་ཤེས་སྣང་བ་ཁྱབ་པར་གྱིས། །ཞེས་གསུངས་སོ། །རི་རི་པས་སེམས་ཅན་གྱི་དོན་གྱིས་ཤིག་པར་གསོལ་བ་བཏབ་པ། ཅིག་(གཅིག་)པུའི་ཞི་བདེ་དོན་གཉེར་བའི། །ཉན་རང་ལྟ་བུའི་བློ་ཐོང་ལ། །ན་རོ་ཆོས་ཀྱི་སྒྲོན་མ་ཡིས། །འགྲོ་བའི་མུན་པ་བསལ་དུ་གསོལ། །
1-1-79a
ཞེས་བརྗོད་དོ། །ཀ་སོ་རི་པས་སེམས་ཅན་གྱི་ཉོན་མོངས་པའི་ཟུག་རྔུ་སོལ་ཅིག་པར་གསོལ་བ་བཏབ་པ། ན་རོ་ཆོས་ཀྱི་སྨན་པ་ཡིན། །དམ་ཆོས་སྨན་གྱི་སྨན་སྦྱོར་གྱིས། །འགྲོ་བ་ནད་གྱིས་གདུངས་པ་ལ། །ཉོན་མོངས་ཟུག་རྔུ་དབྱུང་དུ་གསོལ། །གང་ཡང་སྐྱེ་བ་མེད་པའི། །རང་རིག་རང་གསལ་ནམ་མཁའ་ལ། །དམ་ཆོས་སྤྲིན་གྱི་ཆར་རྒྱུན་གྱིས། །གདུལ་བྱའི་ལོ་ཐོག་སྨིན་པར་མཛོད། །ཅེས་ལུང་བསྟན་ནོ། །རྡོ་རྗེ་མཁའ་འགྲོ་མས། སྨིན་གྲོལ་གྱིས་རྗེས་སུ་ཟུང་ཅིག་(ཞིག་)པར་གསོལ་བ་བཏབ་པས། དེ་ནས་ན་རོ་པས་ཉིད་ཀྱི་ཞལ་ནས། བླ་མ་སངས་རྒྱས་བཀའ་ལུང་དང་། །རྡོ་རྗེ་སྤུན་གྱི་གསུང་བཞིན་དུ། །མདོ་རྒྱུད་སྙིང་པོ་དོན་གྱི་བཅུད། །ངེས་མེད་ཡུལ་དུ་གྲགས་པར་བྱ། །ཞེས་ཞལ་གྱིས་བཞེས་པ་དང་། བླ་མ་ཏེ་ལོ་པ་ནམ་མཁའ་ལ་མི་སྣང་བར་གྱུར་ཏོ། །གདུལ་བྱ་སྐལ་བར་ལྡན་པ་རྣམས་དད་ཅིང་། གྲོལ་བར་གྱུར་ནས་བསྟན་པ་དར་ཞིང་རྒྱས་པར་མཛད་དོ། །རྣལ་འབྱོར་གྱི་དབང་ཕྱུག་ཆེན་པོ་ན་རོ་པ་ཞེས་བྱ་བའི་རྣམ་པར་ཐར་པ། ཕྱི་ནང་གསང་བ་དེ་ཁོ་ན་ཉིད་ཀྱི། རྣམ་ཐར་ཡི་གེར་བཀོད་པའོ། །བརྡའ་དོན་འགྲོལ་བྱེད་དོ། །རྗེ་ན་རོ་པའི་སློབ་མ་ཐུགས་ཀྱི་སྲས་བཞི་ནི། ཀ་ན་ཀ་ཤྲཱི། མ་ན་ཀ་ཤྲཱི། པཉྩ་ར་ཀྲི་ཏ། ཕྃ་ཐིང་པའོ། །ཡང་ཏི་(དཱི་)པྃ་ཀ་ར་དང་། ཏི་ཕུ་བ་དང་། ནག་པོ་དམ་ཚིག་རྡོ་རྗེ་དང་། གྷུ་ན་རྡེ་རི་བ་དང་། མཻ་ཏྲི་པ་དང་། ཁ་ཆེ་ཛྙཱ་ན་ཀ་དང་། དེའི་བུ་གཉིས་ཡོད་པའོ། །རྗེ་ལྡོམ་བྷི་བ་ཆུ་ངུ་ནི། རྗེ་ན་རོ་པའི་སློབ་མ་ཡིན་ལ། དེ་ནས་རྗེ་ཏི་(དཱི་)པྃ་ཀ་ར་རྗེས་སུ་བཟུང་བས། རྗེ་ན་རོ་པ་དང་ཞལ་སྤྲད་པའོ། །ཞེས་རྗེ་མར་པས་གསུངས་སོ། །ཡང་རྗེ་སྤེན་ཏ་བ་ནི། རྗེ་ན་རོ་པའི་སློབ་མ་ཡིན་ཏེ། རྗེ་མར་པ་དང་སྤྲོད་མཁན་ཡིན་ནོ། །ཡང་ལོ་
1-1-79b
ཙྪ་བ་བརྒྱ་(རྒྱ་)བརྩོན་འགྲུས་སེང་གེ་དང་། ནག་ཚོ་གཉིས་ཞལ་ཡུད་རེ་མཐོང་བ་ཙམ་ཡིན་ནོ། །རྗེ་ཏེ་ཕུ་བ་ནི་ཕྱིས་ཀ་སོ་རི་པ་དང་། རི་རི་པའི་སློབ་མ་ཡིན་ཞེས་གསུངས་སོ། །རྗེ་མར་པ་ནི་ཕྱོགས་བཞིའི་རྒྱུད་པའི། ཆུ་བོ་ཞེས་བྱ་བ་གཙོར་མཛད་པར་གདའོ།། །།
༄། །བླ་མ་ན་རོ་པའི་རྡོ་རྗེའི་མགུར།
བླ་མ་ན་རོ་པའི་རྡོ་རྗེའི་འགུར་(མགུར)། ལྟ་བའི་ཟུང་འཇུག་བློ་རེ་བདེ། །བསྒོམ་པའི་ཟུང་འཇུག་ཉམས་རེ་དགའ། །སྤྱོད་པའི་ཟུང་འཇུག་དང་རེ་སྤྲོ། །མྱ་ངན་འདས་པའི་སངས་རྒྱས་དང་། །འགྲོ་དྲུག་འདུས་པའི་ཤེས་པ་གཉིས། །ཆོས་ཀྱི་དབྱིངས་སུ་ངོ་བོ་ཅིག(གཅིག) །ལྟ་བའི་ཟུང་འཇུག་དེ་ལ་མཛོད། །སྣ་ཚོགས་སྣང་བ་དཀར་དམར་དང་། །བརྗོད་དུ་མེད་པའི་ཡེ་ཤེས་གཉིས། །ཤེས་པས་རིག་ན་ཅིག་(གཅིག་)གི་ངང་། །བསྒོམ་པའི་ཟུང་འཇུག་དེ་ལ་མཛོད། །ནམ་མཁའ་བཞིན་དུ་ཀུན་ལ་ཁྱབ། །འཇའ་ཚོན་བཞིན་དུ་ངོས་གཟུང་མེད། །ཆུ་བོ་བཞིན་དུ་རྒྱུན་ཆད་མེད། །སྤྱོད་པའི་ཟུང་འཇུག་དེ་ལ་མཛོད། སྣང་བ་ཆོས་སྐུར་མ་ཤེས་ན། །བལྟ་བའི་ཟུང་འཇུག་ཅི་ལ་བགྱིད། །སྡུག་བསྔལ་ཆོས་སྐུར་མ་ཤེས་ན། །བསྒོམ་པའི་ཟུང་འཇུག་ཅི་ལ་བགྱིད། །ཞེན་པ་ནང་ནས་མ་ལོག་ན། །སྤྱོད་པའི་ཟུང་འཇུག་ཅི་ལ་བགྱིད། །ཕུང་པོ་ལྔ་པོ་ཡན་པར་ཤོར། །རིགས་ལྔའི་རྒྱ་ཡིས་མ་ཐེབས་སོ། །ཉིན་མཚན་མེད་པར་ཐ་དད་ཞེན། །སྣང་བ་རྒྱ་ཡིས་མ་ཐེབས་སོ། །སེམས་ལ་ཉོན་མོངས་དུག་མེད་འབྱུང་། །གདམས་ངག་ཁོང་དུ་མ་ཆུད་དོ། །རང་ལུས་འཇིག་རྟེན་གྱི་རྒྱན་དུ་སོང་། །ཉོན་མོངས་ལམ་དུ་མ་བླངས་སོ། །ཞེས་གསུངས་སོ། །ཡང་ན་རོ་པའི་འགུར་(མགུར་)གསུངས་པ། ལྟོས་དང་སྤྱོད་པ་བྱེད་པ་རྣམས། །ས་བོན་དུས་སུ་མ་སྨིན་པར། །མྱུ་གུ་ལོ་མ་རྔས་པ་ལ། །ལོངས་སྤྱོད་བཟང་པོ་བཏུབ་ན་བགྱི། །བསྐྱེད་ཤིང་རྒྱུན་བཟང་བཙུགས་མ་ཐག །ལས་སུ་
1-1-80a
མི་རུང་གཙུག་མ་ཐོག །བཅད་ནས་ཁང་ཤིང་བཏུབ་ན་བགྱི། །བུ་འམ་བུ་མོ་སྐྱེས་མ་ཐག །ལོ་མངས་མ་ལོངས་མདའ་མ་བསླབས། །ཕ་མའི་སྤྱོད་པ་བཏུབ་ན་བགྱི། །མ་ཧེ་ཕྲུག་གུ་སྐྱེས་མ་ཐག །འོ་མ་གཞོ་(བཞོ་)རུ་བཏུབ་ན་བགྱི། །ཇི་ལྟར་ཤིང་ལས་བྱུང་བའི་མེ། །འབར་བའི་ཤིང་ལ་མ་རིག་པར། །བཙོ་བསྲེག་བཏུབ་ན་སྤྱོད་པ་བགྱི། །དེ་སོགས་དཔེ་རྣམས་བརྗོད་མི་ལང་། །དཔེ་བརྗོད་རིམ་པ་དེ་རྣམས་ཀྱིས། །ཕྱི་རོལ་རྟེན་ཅིང་འབྲེལ་འབྱུང་འདི། །ནང་ནས་ཏིང་འཛིན་སྐྱེ་བ་གཉིས། །རིམས་ཀྱིས་ཡོན་ཏན་མ་སྐྱེས་པར། །ནུས་པ་དུས་ཅིག་(གཅིག་)རྫོགས་པ་མེད། །དེས་ན་རྣལ་འབྱོར་སྤྱོད་པ་བ། །ནུས་པ་རིམས་ཀྱི་མ་རྫོགས་པར། །སྤྱོད་པ་བྱེད་ན་སྨྱོན་པ་ཡིན། །ཡིན་ནམ་མིན་པ་ཕྱི་རོལ་གྱི། །སྣང་བ་རྟེན་ཅིང་འབྲེལ་ལ་ལྟོས། །ཞེས་པ་སྤྱོད་པ་ལ་བཞུད་ཁར་གསུངས་སོ། །
༈ དཀའ་བ་མཆོག་བརྒྱད་ཀྱི་མགུར།
ཡང་ན་རོ་པས་འགུར་(མགུར་)བཞེངས་པ། མི་ཁོམ་བརྒྱད་པོ་ཀུན་སྤངས་ནས། །དལ་འབྱོར་མི་ལུས་ཐོབ་པར་དཀའ། །འཁོར་བའི་ཆོས་ལ་ཡིད་སྐྱོ་བའི། །མྱ་ངན་འདས་པ་བསྒྲུབ་པར་དཀའ། །ན་བ་ཚ་བ་ཀུན་སྤངས་པའི། །བཀོལ་དུ་བཏུབ་པའི་ལུས་ཀྱང་དཀའ། །རྒྱུད་དང་མན་ངག་གཉིས་ལྡན་པའི། །སྙིང་རྗེ་ཅན་གྱི་སློབ་དཔོན་དཀའ། །དད་པ་སྐྱོ་ངལ་མེད་པའི། །རི་ཁྲོད་འགྲིམ་པའི་སློབ་མ་དཀའ། །འཇིགས་དང་དོགས་པ་རྣམས་སྤངས་པའི། །ཕུན་སུམ་ཚོགས་པའི་དགོན་པ་དཀའ། །ལྟ་སྤྱོད་ཟུང་དུ་འཇུག་པའི། །བསམ་པ་མཐུན་པའི་ཆོས་གྲོགས་དཀའ། །དེ་བདུན་འཛོམ་པར་གྱུར་ཀྱང་ནི། །རྩེ་ཅིག་(གཅིག་)གི་བསམ་གཏན་བསྒོམ་པར་དཀའ། །-ཞེས་-དཀའ་བ་མཆོག་བརྒྱད་ན་རོ་པའི་གདུགས་ཀྱི་ཡུ་བ་ལ་བྲིས་ནས་འདུག་གསུང་།
༈ ཉོན་མོངས་ཡེ་ཤེས་སུ་བསྒྱུར་བའི་མགུར།
ཡང་ན་རོ་པས་འགུར་(མགུར་)གསུངས་པ། འཁོར་ལོ་སྒྱུར་རྒྱལ་
1-1-80b
དཔུང་གི་ཚོགས། །གླིང་རྣམས་ཀུན་ལ་དབང་བྱེད་བཞིན། །ལྷན་ཅིག་སྐྱེས་པའི་རོ་རྙེད་ན། འཁོར་བ་དབང་བསྒྱུར་བདེ་བ་ཆེ། །གསེར་འགྱུར་རྩིའི་རྣམ་པ་ཡིས། །ལྕགས་རྣམས་གསེར་དུ་འགྱུར་བ་ལྟར། །རིན་ཆེན་དབང་གི་ནུས་པ་ཡིས། །ཉོན་མོངས་གཉིས་མེད་ཡེ་ཤེས་འགྱུར། །ཚོགས་འཁོར་གྱི་དུས་སུ་གསུངས་སོ། །ན་མོ་གུ་རུ། རྒྱ་གར་གྱི་དུར་ཁྲོད་ཆེན་པོ་འབར་བ་འཛིན་ཞེས་བྱ་བར། རྗེ་ན་རོ་པ་ལ་ཚོགས་དཔོན་ཞུས་པས། དཔལ་གསང་བ་འདུས་པའི་ལུགས་ཀྱི་ཚོགས་ཀྱི་འཁོར་ལོ་བསྐོར་ནས། ཀ་ན་ཀ་ཤྲི་དང་། མ་ན་ཀ་ཤྲི་དང་། པྲད་ཉ་ར་ཀྲི་ཏ་ཛྙ་ཀ་ར་པེན་ཏ་ལ་སོགས་པ་མང་པོ་ཡོད། ཡོན་བདག་རྒྱལ་པོ་ཟླ་དབང་ཞེས་པ་དང་། ཚངས་དབང་ཟླ་འོད་ཞེས་པས་ཞུས་ཏེ། ཚོགས་གྲལ་དུ་རྟོགས་པའི་དབང་གིས་བརྡའ་ཞུས་པས།
༈ དབང་གི་བརྡ་དོན་བཀྲོལ་བའི་མགུར།
ཧཱུྃ་གཞི་དངོས་པོ་གནས་ལུགས་ལྷུན་གྲུབ་ལ། །ལམ་དབང་བཞི་བསྐུར་བས་སྨིན་པར་བྱེད། །ཐབས་དང་ཤེས་རབ་ཟུང་འཇུག་ལ། །འབྲས་བུ་སྐུ་བཞིར་ལམ་དུ་སློངས། །ལུས་ལ་བུམ་པའི་དབང་བསྐུར་བས། །རྩ་རྣམས་གསལ་སྟོང་ཉིད་དུ་དག །གསལ་བ་རྒྱུན་གྱིས་དག་པ་ལ། །ལམ་དུ་ལྷའི་འཁོར་ལོ་བསྒོམ། །འབྲས་བུ་སྤྲུལ་སྐུའི་ནུས་པ་བཞག །སྐུ་རྡོ་རྗེ་སྐྱེ་བ་མེད་པར་འགྱུར། །ངག་ལ་གསང་བའི་དབང་སྐུར་བས། །རླུང་རྣམས་སྣང་སྟོང་ཉིད་དུ་དག །སྟོང་པ་རྒྱུན་གྱིས་དག་པ་ལ། །ལམ་དུ་སྔགས་ཀྱི་འཁོར་ལོ་བསྒོམ། །འབྲས་བུ་ལོངས་སྐུའི་ནུས་པ་བཞག །གསུང་རྡོ་རྗེ་བརྗོད་དུ་མེད་པར་གྱུར། །སེམས་ལ་གསུམ་པའི་དབང་སྐུར་བས། །བདུད་རྩི་བདེ་སྟོང་ཉིད་དུ་དག །བདེ་བ་རྒྱུན་གྱིས་དག་པ་ལ། །ལམ་དུ་བདེ་ཆེན་འཁོར་ལོ་བསྒོམ། །འབྲས་བུ་
1-1-81a
བདེ་ཆེན་སྐུ་ཐོབ་པ། །ཐུགས་རྡོ་རྗེ་རྟོག་པ་མེད་པར་གྱུར། །དེ་ལྟར་དབང་བའི་མདུད་པ་བཀྲོལ། །ལམ་དུ་སློངས་ན་ཡེ་ཤེས་འཆར། །ལུས་ངག་ཡིད་གསུམ་ཐམས་ཅད་ལ། །ལྷན་ཅིག་སྐྱེས་པའི་མ་རིག་པ། །དེ་དག་པར་བྱ་ཕྱིར་དབང་བསྐུར་བས། །ཚིག་དབང་རིན་ཆེན་ཞེས་བྱ་བ། །བསྐུར་བྱར་མི་འདོད་ཐོབ་བྱར་འདོད། །བདེ་གསལ་སྟོང་པ་ངོ་བོའི་ཉམས། །མི་རྟོག་རྒྱུན་གྱིས་དག་པ་ལས། །ལམ་དུ་ལྷན་ཅིག་སྐྱེས་པ་བསྒོམ། །འབྲས་བུ་ཆོས་སྐུ་རྒྱུད་ལ་འཆར། །དེ་བཞིན་གཤེགས་པ་ཐམས་ཅད་ཀྱི། སྐུ་གསུང་ཐུགས་ཀྱི་རྡོ་རྗེར་འགྱུར། །རྒྱུ་དང་ལམ་དང་འབྲས་བུར་ཡང་། །དབང་བཞི་ལས་ནི་མ་འདས་པ། །དབང་བཞིའི་ལམ་དུ་འཁོར་བ་ཡིན། །དེ་ཉམས་སུ་མྱོང་ན་གྲོལ་བའི་ལམ། །ཉམས་རྒྱུད་ལ་བསྐྱངས་ན་རྟོགས་པ་འཆར་དབང་བཞིའི་དོན་ལས་མི་འདའ་ན། །དམ་ཚིག་ཚུལ་བཞིན་བསྲུང་བ་ཡིན། །ཞེས་གསུངས་པ་དང་། ཡང་རང་གི་རྩ་བའི་སློབ་མ་གསུམ་གྱི་(གྱིས་)ཞུས་པ་ནི། རྗེ་བཙུན་ལགས། རིག་པ་སྐད་ཅིག་མ་གཅིག་ལ་དབང་བཞི་ཅི་ལྟར་ཚང་ཞུས་པས། དེའི་ལན་དུ།
༈ རིག་མ་སྐད་ཅིག་ལ་དབང་བཞི་ཚང་ཚུལ་གྱི་མགུར།
ལྷན་ཅིག་སྐྱེས་པའི་ཡེ་ཤེས་ནི། །མཆོག་གི་དབང་པོ་སྒོ་ཕྱེ་ནས། །འཁོར་ལོ་བཞི་ལ་རྒྱུད་པ་ཡིས། །ཉམས་མྱོང་འདི་ལྟར་རྒྱུད་ལ་སྐྱེ། །དགའ་བ་དང་པོ་སྐྱེས་དུས་སུ། །ཆུ་འཛིན་བུམ་པའི་དབང་དུ་འདོད། །མཆོག་དགའ་རྒྱུད་ལ་སྐྱེས་དུས་སུ། །བདེ་བ་འཛིན་པ་གསང་བའི་དབང་། ལྷན་ཅིག་སྐྱེས་པའི་དགའ་བ་ནི། །གསུམ་པ་ཤེས་རབ་ཡེ་ཤེས་ཏེ། །དགའ་བྲལ་རྒྱུད་ལ་སྐྱེས་པ་ན། བཞི་པ་ཚིག་དབང་རིན་པོ་ཆེ། །དབང་བཞི་བསྐུར་བས་ལམ་བཞི་བསྒོམ། །སྨིན་གྲོལ་དབྱེར་མེད་ལམ་འདི་ལྟོས། །ཅེས་(ཞེས་)གདམས་སོ། །
1-1-81b
དེར་རྒྱལ་པོ་ཀེ་སར་བྱུང་བ་ཞེས་བྱ་བས། དེ་བས་ཀྱང་འདུས་པ་ཅིག་(ཞིག་)གསུང་བར་ཞུ་ཞུས་པས། ཚིག་བཞིས་ལན་བཏབ་པ། རིག་པ་རྩེ་གཅིག་བུམ་པའི་དབང་། །བདེ་བ་སྤྲོས་བྲལ་གསང་བའི་དབང་། །བདེ་སྟོང་རོ་ཅིག་(གཅིག་)གསུམ་པའི་དབང་། །བསྒོམ་དུ་མེད་པ་བཞི་པར་བརྗོད། །ཅེས་(ཞེས་)གསུངས་སོ། །
༈ དབང་བཞི་རྟོགས་པའི་མགུར།
ཡང་ན་རོ་པས་འགུར་(མགུར)གསུངས་པ། དད་པ་བརྟེན་པོའི་ས་གཞི་ལ། བུམ་པའི་དབང་གི་ས་བོན་བཏབ། །བསྐྱེད་རྫོགས་གཉིས་ཀྱི་གླང་པོ་ལ། །ཟབ་མོ་དོན་གྱིས་གཉའ་ཤིང་བཀལ། །དམིགས་པ་བརྟན་པོའི་ཐོང་གཙུགས་ནས། །ཐུན་བཞིའི་རྣལ་འབྱོར་བསྐྱངས་པས་རྨོས། །བརྩོན་འགྲུས་དྲག་པོའི་ལྕག་ཀྱིས་(གིས་)འབྲས། །མྱུ་གུ་སྐྱོན་དང་དྲི་མ་དག །སྡོང་པོ་བརྟགས་(རྟགས་)དང་མཚན་མ་སྐྱེས། །ཡལ་གར་ཐུན་མོང་གི་དངོས་གྲུབ་བྱུང་། །མེ་ཏོག་དབང་པོའི་མངོན་སུམ་ཤར། །འབྲས་བུའི་སྤྲུལ་སྐུ་སྣ་ཚོགས་ཤར། །བུམ་དབང་བསྐུར་བའི་རྣལ་འབྱོར་པ། །དེ་ལྟར་རྟོགས་ན་གོ་བ་ཡིན། །རང་རིག་སེམས་ཀྱི་སྐྱེས་བུ་དེས། །གཏུམ་མོ་མེའི་མཚོན་ཐོགས་ནས། །འབྱུང་བ་བཞིའི་རྟ་ལ་ཞོན། །རང་ལུས་རྩའི་ལམ་ལ་ཞུགས། །འཁོར་ལོ་བཞིའི་འཕྲང་ལ་བརྒྱུགས། །མི་ཤིགས་ཐིག་ལེའི་མགོ་བོ་གཅད། །རྣམ་རྟོག་གི་མཚན་མ་བཙོན་དུ་བཟུང་། །བདུད་རྩི་ཆུའི་ལྕགས་སུ་བཅུག །རྣམ་རྟོག་སྙིང་གི་དཀྱིལ་དུ་སྣུབས། །ཡེ་ཤེས་ཕྱོགས་མེད་ཀྱི་ཡུལ་ལ་ཤར། །གསང་དབང་བསྐུར་བའི་རྣལ་འབྱོར་པས། །དེ་ལྟར་རྟོགས་ན་གོ་བ་ཡིན། །ཡབ་ཡུམ་གཉིས་ཀྱི་སྦྱོར་འཚམས་(མཚམས་)སུ། །རྩ་སྦུབས་སྟོང་བའི་གཞུ་མོ་ལ། །སྲ་བ་སའི་བརྒྱུད་ཀྱིས་བརྡུངས། །གཤེར་བ་ཆུའི་མདའ་མོ་ལ། །དྲོ་བ་མེའི་འདེའུ་བཙུགས་ཏེ། །
1-1-82a
སྐྱོད་(བསྐྱོད་)པ་རླུང་གིས་འབེན་ལ་འཕངས། །གླད་པའི་དཀྱིལ་གྱིས་ཧྃ་ལ་ཕོག །བདུད་རྩིའི་ཆུ་ཡིས་ཀུན་ལ་ཁྱབ། །མཆོག་དང་དགའ་བྲལ་བདེ་བ་ཆེ། །དབང་གསུམ་པ་བསྐུར་བའི་རྣལ་འབྱོར་པ། །དེ་ལྟར་རྟོགས་ན་གོ་བ་ཡིན། ལྟ་ན་རང་གི་སེམས་ལ་ལྟོས། །སེམས་ཉིད་ཅིར་ཡང་མ་གྲུབ་པས། །བརྗོད་དུ་མེད་ཅིང་ཡུལ་ལས་འདས། །སྤྲོས་བྲལ་ནམ་མཁའི་ངོ་བོ་ཉིད། །དབང་བཞི་པ་བསྐུར་བའི་རྣལ་འབྱོར་པ། །དེ་ལྟར་རྟོགས་ན་གོ་བ་ཡིན། [།ཞེས་དབང་བཞིའི་རྟོགས་པའི་འགུར་(མགུར་)རོ། །)
༈ ཆོས་དྲུག་དྲིལ་བ་རྡོ་རྗེའི་མགུར།
རྗེ་མར་པ་ལོ་ཙྪ་བ་དེ། བྷྲི་ཀ་(བི་ཀྲ་)མ་ལ་ཤི་(ཤཱི་)ལའི་གནས་ན་བཞུགས་པ་ལ་དུས་ལན་ཅིག་སྐྱོ་ནས་གཟིགས་རྟོག་ལ་སོགས་པ་མཛད་པས་ཀྱང་ཐུགས་སྐྱོ་བ་མ་སངས་ཏེ། སེང་ལྡེང་སྟུག་པོའི་ནགས་གསེབ་ན་ཕར་སྐྱོ་བསང་དུ་ཕྱིན་པས་བླ་མ་ལ་གསོལ་བ་བཏབ་པས། བླ་མ་ན་རོ་པ་མངོན་སུམ་དུ་བྱོན། བུ་ལོ་ཙྪ་བ་སྐྱོ་བ་བསང་བའི་ཕྱིར་ཆོས་དྲུག་དྲིལ་བ་རྡོ་རྗེའི་འགུར་(མགུར་)སྣང་བ་ཡིན་གསུང་། དལ་འབྱོར་གཟུགས་ཀྱི་ཕུང་པོ་འདི། །དབྱར་སྐྱོ་ཙ་ན་འདི་སྐད་གསུངས། །སེམས་ཀྱི་གནང་(གནས་)ཐབས་ལྟ་བའི་རྡེང་(གདེང་)། །ཡུལ་གྱི་གནས་ཐབས་བསྒོམ་པའི་གནད། །ཕྱི་ནི་སྒྱུ་མ་ལྷའི་སྐུ། །ངན་ན་རྩ་གསུམ་འཁོར་ལོ་བཞི། །འོག་ན་ཨ་ཤད་ཙན་ཌ་ལི། །སྟེང་ན་ཧཾ་གི་ཐིག་ལེ་ཅན། །སྟེང་འོག་རླུང་ནི་འཁོར་ལོའི་དབྱིབས། །བར་ན་བདེ་སྟོང་གསལ་བའི་ཉམས། །མིང་ཡང་གཏུམ་མོའི་གདམ་ངག་ཟེར། །སེམས་གནད་དུ་ཚུད་དམ་ལོ་ཙྪ་བ། །དུས་རྨི་ལམ་ཙམ་གྱི་སྤྲུལ་པ་ལ། །གནས་འགྲིན་པ་གནས་ཀྱི་ས་བོན་ཅན། །ཕྱིའི་སྣང་བ་སྒྱུ་མ་ཙམ། །ནང་ན་ཉམས་མྱོང་སྨྲར་མ་བཏུབ། །ཉིན་མཚན་གྱི་སྣང་བ་སྤྲུལ་པའི་སྐུ། །མིང་ཡང་སྒྱུ་ལུས་ཀྱི་གདམ་ངག་ཟེར། །ཞེན་པ་བཟློགས་སམ་ལོ་ཙྪ་བ། །གཉིད་དང་རྨི་ལམ་གྱི་བར་ཤེད་ན། །གཏི་
1-1-82b
མུག་ཆོས་སྐུའི་ངོ་བོ་ཉིད། །བརྗོད་མེད་འོད་གསལ་བདེ་བའི་ཉམས། །རྗེས་ལ་འོད་གསལ་རྒྱུ་ཡིས་འདེབས། །མིང་ཡང་འོད་གསལ་གྱི་གདམ་ངག་ཟེར། །སེམས་སྐྱེ་མེད་དུ་གོ་འམ་བསྒོམ་(སྒོམ་)ཆེན་ཀུན། །སྒོ་བརྒྱད་འཁོར་བའི་སྐར་ཁུང་ཅན། །སྒོ་ཅིག་(གཅིག་)ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་ཅིག་(གཅིག་)འབྱེད། །རྣམ་པར་ཤེས་པ་ཆོས་ཉིད་འདས། །མིང་ཡང་འཕོ་བའི་གདམ་ངག་ཟེར། །རླུང་དུས་སུ་ཁེགས་སམ་སྒོམ་ཆེན་ཀུན། །རྨི་ལམ་དུས་ཀྱི་ཤེས་པ་དེ། །བར་དོའི་ཤེས་པས་བསྲེ་དགོས་ཏེ། །ལོངས་སྤྱོད་རྫོགས་པའི་ངོ་བོ་ཅན། རྨི་ལམ་བར་དོ་བསྲེ་འཕོའི་གནད། །མིང་ཡང་བར་དོའི་གདམ་ངག་ཟེར། །རྨི་ལམ་འབྱོངས་སམ་ལོ་ཙྪ་བ། །རང་ལུས་དུས་ཀྱི་ཚད་ལ་ཕེབས། །གཞན་སྣང་མཚན་ལྡན་རྟེན་གྱི་ཡུལ། །བར་དུ་ཡིག་འབྲུ་རླུང་གི་རྟ། །རང་ལུས་ཁང་སྟོང་བཞིན་དུ་བསྐྱུར། །གཞན་ལུས་སྤྲུལ་སྐུའི་ངོ་བོ་ཅན། །མིང་ཡང་འཇུག་གི་གདམ་ངག་ཟེར། །རླུང་ལས་སུ་རུང་ངམ་ལོ་ཙྪ་བ། །རྨི་ལམ་དུས་ཀྱི་སྣང་ཚུལ་འདི། །སྐྱེས་བ་རྨིས་ན་ཕོ་འདྲེར་བཟུང་། །བུད་མེད་རྨིས་ན་མོ་འདྲེར་བཟུང་བྱོལ་སོང་རྨིས་ན་ཀླུ་རུ་བཟུང་། །དགའ་བ་རྨིས་ན་སེམས་འཕང་སྐྱེ། །ངན་པ་རྨིས་ན་སྙིང་མི་དགའ། །འདྲེ་རང་སེམས་ཀྱི་རྩ་བ་མ་ཤེས་ན། །བགེགས་ལ་ཟད་པ་མེད་ལ་ཆེ། །ཕྱི་ནང་གི་ཆོས་ལ་ཐོས་པ་དགོས། །གོ་བས་མཐའ་གཉིས་སྤོང་བ་ཡིན། །ཡིན་མིན་གྱི་སྒྲོ་འདོགས་ཆོད་ལགས་པས། །གོལ་སས་མི་འཇིགས་རྡེང་(གདེང་)ཐོབ་མཆི། །གོལ་ས་མེད་པས་དབུ་མའི་ལམ། །ལམ་དེ་ལ་སྐྱོ་བ་ག་ལ་ཡོད། །ཞེས་ཆོས་དྲུག་དྲིལ་བ་རྡོ་རྗེའི་འགུར་(མགུར་)གསུངས་པ་ལགས་སོ། །དེས་སྐྱོ་བ་སངས་སྐད། མར་པ་མགོ་ཡགས། དེས་ངན་བརྫོང་(བརྗོད)། དེས་ལྕིམ་ལུང་པའོ། །ན་རོ་པས་འགུར་(མགུར་)གསུངས་པ། སྣང་
1-1-83a
བའི་མཚན་ཉིད་སྐྱེ་བ་མེད། །འཁོར་བའི་མཚན་ཉིད་གཞི་རྩ་བྲལ། །སེམས་ཀྱི་མཚན་ཉིད་ཟུང་དུ་འཇུག །བླ་མའི་མཚན་ཉིད་རྒྱུད་པར་ལྡན། །ཞེས་གསུངས་སོ། །བླ་མ་རྣམ་གཉིས་ཀྱི་འགུར་(མགུར་)འདི་རྣམས་བླ་མ་མར་པས་ཡི་གེར་བྲིས་ནས། བོད་དུ་བསྣམས་ནས་བྱོན་ནས། མི་ལ་རས་པ་དང་། མར་པ་མགོ་ཡགས་གཉིས་མན་པ་གང་ལ་མ་གནང་བ་ལགས་སོ།། །།སྐྱེ་བ་བྱུང་ན་དངོས་འཛིན་ཡིན། །གཞི་རྩ་བྱུང་ན་རྣམ་རྟོག་ཡིན། །ཕྱོགས་ཆར་ཞེན་ན་ཞེས་འདོད་ཡིན། །རང་བཟོ་བྱེད་ན་རྨོངས་པར་ཟད། །དེ་ལ་ཇོ་བོ་ན་རོ་པའི་ཞལ་ནས། སེམས་དངོས་པོའི་གནས་ཐབས་ནི། སེམས་ཉིད་རྣམ་མེད་དག་ལ་གསལ་བ། ཟུང་འཇུག་གཉིས་སུ་མེད་པའི་ཡེ་ཤེས་གཅིག་ཡིན་ཏེ། ད་ལྟར་གྱི་ཤེས་པ་ཅིར་ཡང་སྣང་བ་ནི་དྲི་མ་འཁྲུལ་པ་བརྫུན་པ་ཡིན་ཏེ། འདི་ཕར་བསལ་བའི་དུས་སུ་རྣམ་པ་ཐམས་ཅད་ནུབ་པའི་ཤེས་པ། གསལ་བའི་རོ་བདེ་བར་ཤར་བ། བདེ་བ་དང་སྟོང་པ་གཉིས་སུ་མེད་པར་བཞེད་དོ། །
༈ སྐལ་ལྡན་གདུལ་བྱ་ལུང་བསྟན་པའི་མགུར།
ན་རོ་པས་གསུང་(གསུངས་)པ། སྔོན་ཚུལ་བཞིན་སྦྱངས་པའི་ལས་འཕྲོ་ཅན། །བོད་ཡུལ་གྱི་མར་ཆུང་ལོ་ཙྪ་ཁྱོད། །འཁོར་ལོ་བསྒྱུར་རྒྱལ་རིན་ཆེན་འཛིན། །དད་པས་རྡོ་ལ་ཡི་གེ་བྲིས། །རིགས་རྒྱུད་ནམ་མཁའི་མེ་ཏོག་ཡལ། །བཀའ་རྒྱུད་ཆུ་བོའི་གཞུང་བས་རིང་། །སེང་གེ་ཁྱུང་གི་ཕྲུ་གུ་བཞིན། །བུ་སློབ་མ་བས་ཀྱང་ཡང་སློབ་བཟང་། །ཐེག་མཆོག་སྙིང་པོའི་དོན་བསྡུས་ནས། །ལས་ཅན་སྨིན་དང་གྲོལ་གྱུར་པའི། །སྐལ་ལྡན་གདུལ་བྱའི་རྒྱལ་པོ་ཁྱོད། །ད་ལྟར་བོད་ཡུལ་དབུས་སུ་སོང་། །བྱང་ཕྱོགས་ཁ་བ་ཅན་གྱི་ལྗོངས། །སྤོས་ཀྱི་ཤིང་རྣམས་རྒྱས་པའི་ས། །སྨན་སྣ་ཚོགས་སྐྱེས་པའི་རི་མགུལ་ན། །སྐལ་ལྡན་གདུལ་བྱ་སྣོད་ལྡན་ཡོད། །
1-1-83b
ཁྱོད་དེ་རུ་སོང་ལ་འགྲོ་དོན་བསྒྲུབས(སྒྲུབས)། །བུ་ཁྱོད་ཀྱི་སྐུ་དོན་གྲུབ་ནས་མཆི། །སྐྱེ་བ་འདི་ཉིད་འདས་གྱུར་ནས། །མཉམ་ཉིད་བདེ་བ་ཆེན་པོའི་གནས། །འོད་གསལ་གྱི་ངང་དུ་མཇལ་བར་བགྱི། །ཞེས་ལུང་བསྟན་པའི་འགུར་(མགུར་)འདི་གསུངས་པ་ལགས་སྐད། །
༈ བླ་མ་རྟོགས་པ་ཕུལ་བའི་མགུར།
ན་མོ་གུ་རུ། རྟོགས་པའི་མཚོ་མོ་མི་མེར་བ་ལགས་ཀྱང་། །ཉམས་མྱོང་གི་འཁྱག་དར་འཆགས་པ་ཅིག་(ཞིག་)བྱུང་། །གདམ་ངག་གི་ཁ་སེར་ཚ་བས་ཀྱང་ཕན་ནམ་ཨང་། །དད་པའི་ཞིང་མི་གཤིན་པ་ལགས་ཀྱང་། །བྱང་ཆུབ་ཀྱི་མྱུ་གུ་འཁྲུངས་པ་ཅིག་(ཞིག་)བྱུང་། །བསྒོམ་བསྒྲུབས་(སྒོམ་སྒྲུབ་)ཀྱི་སོ་ནམ་རེམ་པས་ཀྱང་ཕན་ནམ་ཨང་། །བསམ་གཏན་གྱི་འཁར་དཔེའུ་མི་མཐོ་བ་ལགས་ཀྱང་། །དགྲ་དུག་ལྔའི་ཇག་པ་ཐུབ་པ་བྱུང་། །སེམས་ཡེངས་མེད་ཀྱི་རྩེ་རྗེ་བཞག་པས་ཀྱང་ཕན་ཨང་། །བདག་ཕོ་རྒོ་ཅན་ཅིག་མ་ལགས་ཏེ། །རྗེ་བླ་མ་བས་ཀྱང་ཐུགས་ལ་འདོགས་པ་ཅིག་(ཞིག་)བྱུང་། །དེ་སྔོན་བསགས་ཀྱི་ལས་འཕྲོ་སད་པས་ཀྱང་ཕན་ནམ་ཨང་། །དཔལ་ན་རོ་པའི་དབང་བཞི། བླ་མ་རྟོགས་པ་ཕུལ་བའི་མགུར་རོ།། །།
